នាយករដ្ឋមន្ត្រីអេស្ប៉ាញ លោក Pedro Sanchez កាលពីថ្ងៃអង្គារ (ទី២៣ ខែធ្នូ) បានបង្ហាញពីការមាន «សាមគ្គីពេញទំហឹង» ជាមួយប្រទេសដាណឺម៉ាក និងកោះ Greenland បន្ទាប់ពីសហរដ្ឋអាមេរិកបានប្រកាសពីការតែងតាំងបេសកជនពិសេស ប្រចាំដែនដីនេះ។

លោក Sanchez បានសរសេរសារនៅលើបណ្ដាញសង្គម X ថា៖ «ការគោរពអធិបតេយ្យភាព និងបូរណភាពដែនដី គឺជាចំណុចដ៏សំខាន់របស់សហភាពអឺរ៉ុប (EU) និងសម្រាប់ប្រទេសទាំងអស់របស់ពិភពលោក។ សន្តិសុខនៅតំបន់អាក់ទិក គឺជាអាទិភាពមួយដែលយើងប្រឹងប្រែងធ្វើការជាមួយសម្ព័ន្ធមិត្ត និងដៃគូ។ យើងសូមបង្ហាញពីការមានសាមគ្គីពេញទំហឹងរបស់យើង ជាមួយប្រទេសដាណឺម៉ាក និងប្រជាជននៃកោះ Greenland»។

គួរបញ្ជាក់ថា នៅមុននេះ ប្រធានាធិបតីអាមេរិក លោក Donald Trump បានប្រកាសថា លោក Jeff Landry អភិបាលរដ្ឋ Louisiana នឹងធ្វើជាបេសកជនពិសេសរបស់សហរដ្ឋអាមេរិក ប្រចាំនៅតំបន់ Greenland។

លោក Trump បានសរសេរនៅលើបណ្ដាញសង្គម Truth Social របស់លោកថា លោក Landry ទទួលស្គាល់ «ថា តើកោះ Greenland មានសារៈសំខាន់កម្រិតណា» ចំពោះសន្តិសុខជាតិរបស់សហរដ្ឋអាមេរិក ហើយនឹងជំរុញយ៉ាងខ្លាំងដល់ផលប្រយោជន៍របស់ប្រទេស ដើម្បីធានាសុវត្ថិភាពនៃសម្ព័ន្ធមិត្ត និងពិភពលោកកាន់តែទូលំទូលាយ។

តំបន់ Greenland ដែលជាទឹកដីស្វយ័តក្រោមអធិបតេយ្យភាពរបស់ដាណឺម៉ាក បានទាក់ទាញការចាប់អារម្មណ៍របស់សហរដ្ឋអាមេរិក ដោយសារតែទីតាំងយុទ្ធសាស្ត្រ និងធនធានរ៉ែដ៏មហាសាលរបស់ដែនដីនេះ៕