នាយករដ្ឋមន្ត្រីកូសូវ៉ូ លោក Albin Kurti បានប្រាប់សារព័ត៌មាននៅថ្ងៃពុធ (ទី២៤ ខែធ្នូ) នេះថា កូសូវ៉ូ និងស៊ែរប៊ី ត្រូវតែ «ធ្វើឲ្យទំនាក់ទំនងរបស់ប្រទេសទាំង២ មានប្រក្រតីភាព» ដោយការលើកឡើងនេះ កើតមានក្នុងរយៈពេលជាច្រើនថ្ងៃ មុនការបោះឆ្នោតសភា ដែលរូបលោកកំពុងស្វែងរកការបន្តអាណត្តិ ជាមួយនឹងការគាំទ្រដ៏រឹងមាំបន្ថែមទៀត។

លោក Kurti បានចូលកាន់តំណែងតាំងពីឆ្នាំ២០២១ ហើយកិច្ចព្រមព្រៀងពីមុន ដែលត្រូវបានចុះហត្ថលេខាជាមួយស៊ែរប៊ី ជាប្រទេសដែលមិនទទួលស្គាល់ឯករាជ្យរបស់អតីតខេត្តខ្លួន មិនទាន់ត្រូវបានគោរពនៅឡើយទេ។

លោក Kurti បាននិយាយថា៖ «យើងត្រូវធ្វើឲ្យទំនាក់ទំនងមានប្រក្រតីភាព ជាមួយស៊ែរប៊ី»។ ហើយលោកបានបន្ថែមថា៖ «ប៉ុន្តែការធ្វើឲ្យទំនាក់ទំនងមានប្រក្រតីភាព ជាមួយរបបផ្តាច់ការជិតខាង ដែលមិនទទួលស្គាល់អ្នក ដែលក៏មិនទទួលស្គាល់ផងដែរនូវឧក្រិដ្ឋកម្មដែលបានប្រព្រឹត្តក្នុងសង្គ្រាម គឺពិតជាពិបាកណាស់»។

ភាពតានតឹង រវាងប្រទេសជិតខាងទាំង២ មានកម្រិតខ្ពស់ជារឿយៗ ហើយភាពចលាចលជាថ្មី នឹងផ្តល់ឲ្យរុស្ស៊ីនូវមធ្យោបាយធ្វើឲ្យប្រទេសរបស់លោកមានអស្ថិរភាព។

ដោយសំដៅលើកិច្ចព្រមព្រៀងដែលបានចុះហត្ថលេខាក្រោមការគាំទ្រពីសហភាពអឺរ៉ុប ក្នុងឆ្នាំ២០២៣ លោក Kurti បានសង្កត់ធ្ងន់ថា៖ «យើងមានកិច្ចព្រមព្រៀងធ្វើឲ្យមានប្រក្រតីភាព។ យើងត្រូវតែអនុវត្តវា ដែលបញ្ជាក់ឲ្យមានការទទួលស្គាល់គ្នាទៅវិញទៅមក រវាងប្រទេស២ យ៉ាងហោចណាស់ការទទួលស្គាល់ជាក់ស្ដែងដែរ»៕