ភ្នំពេញ ៖ កុមារ យុវវ័យ ប្រជាពលរដ្ឋជាច្រើនរស់នៅក្នុងមូលដ្ឋានខណ្ឌសែនសុខ និងមកទីតាំងផ្សេងៗ បានសម្រុកមកទទួលការចាក់វ៉ាក់សាំងបង្ការជំងឺកូវីដ-១៩ ដូសទី១ ដូសទី២ ដូសទី៣ និងដូសទី៤ នៅមណ្ឌលសុខភាពទឹកថ្លា ខណ្ឌសែនសុខ រាជធានីភ្នំពេញ។

​បើតាមលោកវេជ្ជបណ្ឌិត ដួង សុគន្ធា ប្រធានមណ្ឌលសុខភាពទឹកថ្លា នៃមនី្ទរសុខាភិបាលរាជធានីភ្នំពេញ ប្រាប់BTV ព័ត៌មាន នាព្រឹកថ្ងៃទី២ ខែមីនា ឆ្នាំ២០២២នេះថា ក្នុងយុទ្ធនាការចាក់វ៉ាក់សាំងបង្ការជំងឺកូវីដ-១៩ ដូសទី៤ និងយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនកុមារអាយុចាប់ពី៦ឆ្នាំ រហូតដល់១៨ឆ្នាំ និងយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនកុមារអាយុចាប់ពី៣ឆ្នាំ រហូតដល់ក្រោម៥ឆ្នាំ ក្នុងមួយថ្ងៃ ពួកគាត់បានអញ្ជើញមកចាក់វ៉ាក់សាំងមានចំនួនជាង៨០០នាក់។ ជាការពិតដោយមានការយកចិត្តទុកដាក់ខ្ពស់បំផុតពីប្រមុខរាជរដ្ឋាភិបាលកម្ពុជា ជាពិសេសសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត សម្តេចបានខិតខំគ្រប់មធ្យោបាយ ដើម្បីរិះរកវ៉ាក់សាំងបង្ការជំងឺកូវីដ-១៩ មកចាក់ជូនប្រជាពលរដ្ឋ។ គិតមកដល់បច្ចុប្បន្នព្រះរាជាណាចក្រកម្ពុជា បានឈានដល់ការចាក់វ៉ាក់សាំងបង្ការជំងឺកូវីដ-១៩ ដូសទី៤ហើយ។ ទន្ទឹមនឹងនោះប្រជាពលរដ្ឋទូទាំងប្រទេស មានការយល់ដឹងច្រើន អំពីសារៈសំខាន់របស់វ៉ាក់សាំងបង្ការជំងឺកូវីដ-១៩នេះ។ បើទោះបីបងប្អូនប្រជាពលរដ្ឋ បានទទួលការវ៉ាក់សាំងគ្រប់ៗគ្នា ប៉ុន្តែប្រមុខរាជរដ្ឋាភិបាល តែងតែផ្តល់អនុសាសន៍ជាច្រើន ដូចជាការអនុវត្តន៍វិធានការសុខាភិបាល ៣កុំ ៣ការពារ ដើម្បីចូលរួមប្រយុទ្ធប្រឆាំង នឹងជំងឺកូវីដ-១៩ ជាពិសេសវីរុសបំប្លែងថ្មី ប្រភេទអូមីក្រុងតែម្តង។ ហើយទោះបីជាក្នុងថ្ងៃបុណ្យទានផ្សេងៗ ក៏មណ្ឌលសុខភាពទឹកថ្លា បើកបំរើការចាក់វ៉ាក់សាំងបង្ការជំងឺកូវីដ-១៩ ជូនបងប្អូនប្រជាពលរដ្ឋជារៀងរាល់ថ្ងៃ ឲ្យតែបងប្អូនប្រជាពលរដ្ឋអញ្ជើញមកពីតំបន់ណាក៏ដោយ ក៏ក្រុមការងារគ្រូពេទ្យរបស់យើងរីករាយសប្បាយចិត្ត ចាក់វ៉ាក់សាំងជូនពួកគាត់ទាំងអស់ផងដែរ។ ជាពិសេសឯកឧត្តមវេជ្ជបណ្ឌិត ងី មានហេង ប្រធានមនី្ទរសុខាភិបាល រាជធានីភ្នំពេញ ប្រធានអូឌី អាជ្ញាធរខណ្ឌ បានយកចិត្តទុកដាក់ជម្រុញដល់ការផ្តល់វ៉ាក់សាំងជូនប្រជាពលរដ្ឋទាំងអស់ ឲ្យដំណើរការទៅបានដោយរលូន។

ទន្ទឹមគ្នានោះដែរ អាណាព្យាបាលនាំកូនៗ ចៅៗអាយុ៣ឆ្នាំ រហូតដល់ក្រោម៥ឆ្នាំ មកទទួលការចាក់វ៉ាក់សាំងបង្ការជំងឺកូវីដ-១៩ ដូសមូលដ្ឋាន និងយុវវ័យ ប្រជាពលរដ្ឋ មកទទួលការចាក់វ៉ាក់សាំងដូសទី២ ដូសទី៣ និងដូសទី៤ នៅមណ្ឌលសុខភាពទឹកថ្លា បាននិយាយស្រដៀងគ្នាថា ពួកគាត់ទាំងអស់ សូមគោរពដឹងគុណប្រមុខដឹកនាំទាំងអស់ ជាពិសេសសម្តេចតេជោ ហ៊ុន សែន នាយករដ្ឋមន្រី្ត បានខិតខំស្វះសែងរកវ៉ាក់សាំងការពារជំងឺកូវីដ-១៩មកចាក់ការពារអាយុជីវិតរបស់ពួកគាត់ ក៏ដូចជាប្រជាពលរដ្ឋទូទាំងប្រទេសផងដែរ។

បើតាមលោក អៀម សិលដុល្លា មន្រី្តការិយាល័យសង្គមកិច្ច និងសុខមាលភាពសង្គម ខណ្ឌសែនសុខ បានឲ្យដឹងថា នៅមណ្ឌលសុខភាពទឹកថ្លា ក្រុមការងារគ្រូពេទ្យទាំងអស់ រងចាំផ្តល់សេវាកម្មចាក់វ៉ាក់សាំងជូនប្រជាពលរដ្ឋទាំងដូសទី១ រហូតដល់ដូសទី៤ ដែលជាដូសជំរុញចុងក្រោយ។ ក៏ដូចជាការរៀបចំរបស់រដ្ឋបាលរាជធានីភ្នំពេញ និងមនី្ទរសុខាភិបាលរាជធានីភ្នំពេញ និងការចូលរួមសម្របសម្រួលពីមន្រី្តសាលាខណ្ឌ គឺរៀបចំដំណើរការចាក់វ៉ាក់សាំងបង្ការជំងឺកូវីដ១៩ ជូនទៅដល់បងប្អូនប្រជាពលរដ្ឋ ដើម្បីទប់ស្កាត់ការរីករាលដាលជំងឺកូវីដ១៩ និងមេរោគបំប្លែងថ្មីបន្តបន្ទាប់ទៀតជូនដល់ប្រជាពលរដ្ឋ។

ជាចុងក្រោយប្រធានមណ្ឌលសុខភាពទឹកថ្លា សូមអំពាវនាវដល់បងប្អូនប្រជាពលរដ្ឋ ដែលមិនទាន់បានចាក់វ៉ាក់សាំងដូសមូលដ្ឋាន ដូសទី១ ដូសទី២ ដូសទី៣ និងដូសទី៤កី្ត សូមអញ្ជើញមកទទួលវ៉ាក់សាំងបង្ការជំងឺកូវីដ១៩ ឲ្យបានគ្រប់ៗគ្នា និងអនុវត្តន៍ឲ្យបានខ្ជាប់ខ្ជួនតាមការអំពាវនាវរបស់ប្រមុខរាជរដ្ឋាភិបាល គឺ៣កុំ ៣ការពារ ៕ អត្ថបទ ៖ រដ្ឋា