ភ្លៀងធ្លាក់យ៉ាងខ្លាំងបានបង្កឱ្យមានទឹកជំនន់យ៉ាងទូលំទូលាយ និងលំហូរល្បប់ភក់យ៉ាងក្រាស់ឃ្មឹក នៅទូទាំងតំបន់ កាលីហ្វ័រនីញ៉ាភាគខាងត្បូង (Southern California) របស់សហរដ្ឋអាមេរិក កាលពីថ្ងៃពុធ (២៤ ធ្នូ) ខណៈអាជ្ញាធរបានព្រមានអ្នកបើកបរកុំឱ្យធ្វើដំណើរតាមដងផ្លូវប៉ះពាល់ ហើយបានជំរុញឱ្យប្រជាជននៅតំបន់លិចទឹក ជម្លៀសខ្លួនចេញជាបន្ទាន់ ឬស្នាក់នៅកន្លែងសុវត្ថិភាព ដោយបង្កការការរំខានយ៉ាងទូលំទូលាយក្នុងថ្ងៃសម្រាកវិស្សមកាលបុណ្យណូអែលដ៏រីករាយ។

អ្នកនាំពាក្យរបស់នាយកដ្ឋានពន្លត់អគ្គិភ័យប្រចាំតំបន់ បាននិយាយថា នៅរមណីយដ្ឋានភ្នំ Wrightwood ដែលពោរពេញដោយភ្លៀងធ្លាក់ នៅភាគខាងកើតទីក្រុង Los Angeles ក្រុមសង្គ្រោះបន្ទាន់បានប្រឹងប្រែងឆ្លើយតបនឹងការហៅទូរសព្ទឱ្យជួយសង្គ្រោះរាប់សិបករណី និងជម្លៀសអ្នកបើកបរទៅកាន់ទីសុវត្ថិភាពនៅពេលយានយន្តពួកគេលិចទឹក។ មន្រ្តីរូបនេះបានបន្តថា ពុំមានរបាយការណ៍អំពីអ្នកស្លាប់ និងរបួសទេ គិតត្រឹមយប់ថ្ងៃពុធដដែលនោះ។

ភ្លៀងធ្លាក់យ៉ាងខ្លាំងក្នុងតំបន់មួយចំនួន ត្រូវបានបង្កឡើងដោយព្យុះចុងក្រោយបំផុតនៃតំបន់នេះ ទាក់ទងនឹងកំសួលសំណើមបរិយាកាស ពោលគឺ ចរន្តសំណើមក្រាស់ៗប្រមូលផ្ដុំលើអាកាស ដែលបានស្រូបចេញពីមហាសមុទ្រប៉ាស៊ីហ្វិក ហើយបង្កជាភ្លៀងធ្លាក់ទៅលើដីគោកលើតំបន់ Los Angeles។

យោងតាមសេវាអាកាសធាតុជាតិសហរដ្ឋអាមេរិក ព្យុះភ្លៀងមុនបុណ្យណូអែលមួយថ្ងៃនេះ ត្រូវបានរំពឹងថា នឹងបន្តរំខានរហូតដល់ថ្ងៃសុក្រខាងមុខ ដែលបង្កឱ្យមានស្ថានភាពបើកបរមិនមានសុវត្ថិភាព ក្នុងអំឡុងពេលធ្វើដំណើរថ្ងៃឈប់សម្រាកដ៏មមាញឹកបំផុត៕