លោក Tedros Adhanom Ghebreyesus អគ្គនាយកអង្គការសុខភាពពិភពលោក(WHO) បាននិយាយថាឆ្នាំ២០២៥ បាននាំមកនូវការកើនឡើងដ៏សំខាន់នៃការថែទាំសុខភាពសកល ប៉ុន្តែបានព្រមានថា ការកាត់មូលនិធិ និងវិបត្តិមនុស្សធម៌ កំពុងគំរាមកំហែងដល់វឌ្ឍនភាពនេះ។

នៅក្នុងសារវីដេអូដែលថតទុក លោក Tedros បានលើកឡើងពីការអនុម័តកិច្ចព្រមព្រៀងជំងឺរាតត្បាតរបស់អង្គការសុខភាពពិភពលោក ថាជាសមិទ្ធផលធំបំផុតប្រចាំឆ្នាំ ដោយចាត់ទុកថា វាជា «គំរូដ៏មានឥទ្ធិពលនៃអ្វីដែលពហុភាគីនិយមអាចផ្តល់ឲ្យ នៅពេលដែលប្រទេសនានាជ្រើសរើសយកកិច្ចសហប្រតិបត្តិការជាជាងការខ្វែងគំនិតគ្នា»។

លោក Tedros និយាយថា ការកាត់បន្ថយមូលនិធិបានបង្ខំឱ្យអង្គការសុខភាពពិភពលោក កាត់បន្ថយកម្លាំងពលកម្មរបស់ខ្លួន។ វិបត្តិនេះក៏អាចជំរុញប្រទេសនានាឱ្យមានការពឹងផ្អែកលើខ្លួនឯងកាន់តែច្រើន និងជួយអង្គការសុខភាពពិភពលោកឱ្យកាន់តែឯករាជ្យ និងមានភាពធន់ ហើយពិភពលោកនៅតែត្រូវការទីភ្នាក់ងារ និងបេសកកម្មរបស់ខ្លួន ដើម្បីធានាដល់សុខភាពសកល។