រដ្ឋាភិបាលបារាំង បានថ្កោលទោសលើបម្រាមទិដ្ឋាការដែលបានដាក់ដោយរដ្ឋបាលលោក Trump លើ លោក Thierry Breton អតីតស្នងការសហភាពអឺរ៉ុបដែលបានជួយជំរុញច្បាប់សេវាឌីជីថលរបស់សហភាពអឺរ៉ុប ដែលកាលពីពេលថ្មីៗនេះបានកំណត់គោលដៅលើក្រុមហ៊ុនបច្ចេកវិទ្យាកំពូលៗរបស់សហរដ្ឋអាមេរិក។

រដ្ឋបាលលោក Trump បានដាក់បម្រាមទិដ្ឋាការលើ លោក Breton និងអ្នកធ្វើយុទ្ធនាការប្រឆាំងព័ត៌មានក្លែងក្លាយផ្សេងទៀត ដែលខ្លួននិយាយថាមានជាប់ពាក់ព័ន្ធក្នុងការពិនិត្យវេទិកាប្រព័ន្ធផ្សព្វផ្សាយសង្គមរបស់សហរដ្ឋអាមេរិក ជាចំណាត់ការចុងក្រោយក្នុងយុទ្ធនាការមួយដោយផ្តោតលើច្បាប់អឺរ៉ុប ដែលមន្ត្រីអាមេរិកនិយាយថាអនុវត្តហួសពីនិយ័តកម្មផ្លូវច្បាប់។

លោក Breton អតីតរដ្ឋមន្ត្រីក្រសួងហិរញ្ញវត្ថុបារាំង និងជាស្នងការអឺរ៉ុបសម្រាប់ទីផ្សារខាងក្នុងពីឆ្នាំ២០១៩ ដល់ឆ្នាំ២០២៤ គឺជាបុគ្គលលេចធ្លោបំផុតដែលត្រូវបានកំណត់គោលដៅ។ អនុរដ្ឋមន្ត្រីក្រសួងការទូតសាធារណៈរបស់សហរដ្ឋអាមេរិក លោក Sarah Rogers បញ្ជាក់អំពីបម្រាមដោយបានចាត់ទុក លោក Breton ថាជា «មេគំនិត» នៃច្បាប់សេវាឌីជីថល។

មន្ត្រីរបស់លោក Trump បានបញ្ជាឱ្យអ្នកការទូតអាមេរិកបង្កើតការប្រឆាំងទៅនឹងច្បាប់សេវាឌីជីថល (DSA) ដ៏សំខាន់របស់សហភាពអឺរ៉ុបក្នុងគោលបំណងប្រយុទ្ធប្រឆាំងការនិយាយពីភាពស្អប់ខ្ពើម ព័ត៌មានក្លែងក្លាយនិងការផ្សព្វផ្សាយព័ត៌មានមិនពិត ប៉ុន្តែទីក្រុងវ៉ាស៊ីនតោននិយាយថា រារាំងសេរីភាពនៃការនិយាយស្តី និងដាក់បន្ទុកលើក្រុមហ៊ុនបច្ចេកវិទ្យាអាមេរិក។