ប្រព័ន្ធផ្សព្វផ្សាយរដ្ឋបានរាយការណ៍កាលពីថ្ងៃពុធថា កងឆ្មាំបដិវត្តន៍ឥស្លាមអ៊ីរ៉ង់ (IRGC) បានរឹបអូសនាវាមួយដែលដឹកប្រេងឥន្ធនៈរត់ពន្ធចំនួន ៤ លានលីត្រ នៅក្នុងដែនទឹកភាគខាងត្បូងនៃប្រទេសនេះ និងបានឃាត់ខ្លួនសមាជិកនាវិកបរទេសចំនួន ១៦ នាក់។ 

យោងតាមលោក Abbas Gholamshahi មេបញ្ជាការតំបន់នៃកងទ័ពជើងទឹករបស់ (IRGC) នាវានេះត្រូវបានស្ទាក់ចាប់ដោយកងកម្លាំងជើងទឹក ខណៈពេលដែលវាកំពុងរៀបចំចាកចេញពីដែនទឹកអ៊ីរ៉ង់។ លោក Gholamshahi មិនបានកំណត់អត្តសញ្ញាណទង់ជាតិ ម្ចាស់ ឬគោលដៅរបស់នាវានោះទេ ហើយលោកក៏មិនបានបញ្ជាក់ថា ពេលណាដែលការរឹបអូសនាវា បានកើតឡើងនោះទេ។

លោកបាននិយាយថា នាវានេះបានប្រមូលប្រេងឥន្ធនៈពីទូកតូចៗ ហើយមានបំណងផ្ទេរប្រេងឥន្ធនៈទាំងទៅនាវាធំៗ នៅខាងក្រៅដែនទឹកក្នុងតំបន់។

លោកមេបញ្ជាការ បានពិពណ៌នាអំពីបេសកកម្មនេះថា ជា «ប្រតិបត្តិការឆាប់រហ័ស និងម៉ឺងម៉ាត់» ដែលកំណត់គោលដៅទៅលើ «ការរត់ពន្ធប្រេងឥន្ធនៈដែលមានអង្គការចាត់តាំង»។

នាវិកត្រូវបានបញ្ជូនទៅអាជ្ញាធរយុត្តិធម៌។ លោក Gholamshahi បានបន្ថែមថា ប្រេងឥន្ធនៈ ត្រូវបានរឹបអូស ហើយការស៊ើបអង្កេតកំពុងដំណើរការ ដើម្បីកំណត់អត្តសញ្ញាណបណ្តាញរត់ពន្ធដែលពាក់ព័ន្ធ៕