ក្រុមអ្នកជំនាញអង្គការសហប្រជាជាតិបាននិយាយនៅក្នុងរបាយការណ៍មួយដែលចេញផ្សាយកាលពីថ្ងៃពុធថា ក្រុមជ្រុលនិយមអាល់-សាបាប (Al-Shabab) នៅតែបង្កការគំរាមកំហែងភ្លាមៗដ៏ធំបំផុតចំពោះសន្តិភាព និងស្ថិរភាព នៅក្នុងប្រទេសសូម៉ាលី និងតំបន់ ជាពិសេសប្រទេសកេនយ៉ា។

ក្រុមអ្នកជំនាញបានលើកឡើងថា ទោះបីជាមានកិច្ចខិតខំប្រឹងប្រែងជាបន្តបន្ទាប់ដោយកងកម្លាំងសូម៉ាលី និងអន្តរជាតិ ដើម្បីទប់ស្កាត់ប្រតិបត្តិការដោយក្រុមអាល់-សាបាប ដែលមានទំនាក់ទំនងជាមួយក្រុមអាល់កៃដាក៏ដោយ ក៏សមត្ថភាពរបស់ក្រុមនេះ ក្នុងការវាយប្រហារដ៏ស្មុកស្មាញ និងមិនសមាមាត្រ នៅក្នុងប្រទេសសូម៉ាលី នៅតែមិនថយចុះ»។

ពួកគេបាននិយាយថា ការគំរាមកំហែងនេះ មិនត្រឹមតែមកពីសមត្ថភាពរបស់ក្រុមអាល់-សាបាប ក្នុងការវាយប្រហារប៉ុណ្ណោះទេ រួមទាំងនៅក្នុងរដ្ឋធានីម៉ូហ្គាឌីស៊ូ (Mogadishu) ជាកន្លែងដែលក្រុមនេះ បានព្យាយាមធ្វើឃាតប្រធានាធិបតីនៅថ្ងៃទី ១៨ ខែមីនា ប៉ុន្តែថែមទាំងមកពីប្រតិបត្តិការជំរិតទារប្រាក់ដ៏ស្មុកស្មាញ ការជ្រើសរើសដោយបង្ខំ និងយន្តការឃោសនាដ៏មានប្រសិទ្ធភាពផងដែរ។

ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃអង្គារ បានបោះឆ្នោតជាឯកច្ឆន្ទ ដើម្បីបន្តការអនុញ្ញាតសម្រាប់កងកម្លាំង «គាំទ្រ និងរក្សាស្ថិរភាព» របស់សហភាពអាហ្វ្រិក នៅក្នុងប្រទេសសូម៉ាលី រហូតដល់ថ្ងៃទី ៣១ ខែធ្នូ ឆ្នាំ ២០២៦។ កងកម្លាំងនេះ រួមមានបុគ្គលិកស្លៀកពាក់ឯកសណ្ឋានចំនួន១១.៨២៦នាក់ រួមទាំងនគរបាលចំនួន ៦៨០នាក់ ផងដែរ៕