ក្រសួងការពារជាតិរុស្ស៊ីបាននិយាយថា យន្តហោះទម្លាក់គ្រាប់បែកយុទ្ធសាស្ត្រ Tu-95MS របស់រុស្ស៊ី បានបំពេញបេសកកម្មហោះហើរដែលបានគ្រោងទុកពីខាងលើដែនទឹកអព្យាក្រឹតនៃសមុទ្រ Barents និង  សមុទ្រន័រវែស ហើយត្រូវបានអមដំណើរដោយយន្តហោះចម្បាំងបរទេស នៅក្នុងតំបន់មួយចំនួន។

ក្រសួងបានអះអាងថា៖«យន្តហោះទម្លាក់គ្រាប់បែករយៈចម្ងាយឆ្ងាយ Tu-95MS នៃកងកម្លាំងអាកាស  រុស្ស៊ី បានធ្វើការហោះហើរតាមកាលវិភាគនៅក្នុងដែនអាកាសលើដែនទឹកអព្យាក្រឹតនៃសមុទ្រ Barents និងសមុទ្រន័រវែស។ រយៈពេលហោះហើរ គឺច្រើនជាង ៧ ម៉ោង»។

យន្តហោះចម្បាំង Su-33 របស់កងទ័ពជើងទឹករុស្ស៊ី បានអមដំណើរយន្តហោះទម្លាក់គ្រាប់បែករយៈចម្ងាយឆ្ងាយ។ ក្រសួងបានបន្ថែមថា៖«នៅដំណាក់កាលជាក់លាក់នៃផ្លូវហោះហើរយន្តហោះទម្លាក់គ្រាប់បែករយៈចម្ងាយឆ្ងាយ ត្រូវបានអមដំណើរដោយយន្តហោះចម្បាំងរបស់បរទេស។

ក្រសួងបាននិយាយទៀតថា ក្រុមអាកាសចរណ៍រយៈចម្ងាយឆ្ងាយតែងតែហោះហើរពីលើដែនទឹក អព្យាក្រឹតនៃមហាសមុទ្រអាក់ទិក អាត្លង់ទិកខាងជើង មហាសមុទ្រប៉ាស៊ីហ្វិក ក៏ដូចជាសមុទ្របាល់ទិក និងសមុទ្រខ្មៅ។

យោធារុស្ស៊ីបានបញ្ជាក់ជាថ្មីថា៖«ការហោះហើរទាំងអស់របស់យន្តហោះកងកម្លាំងអវកាសរុស្ស៊ី ត្រូវបានអនុវត្តយ៉ាងតឹងរ៉ឹងតាមច្បាប់អន្តរជាតិ ស្តីពីការប្រើប្រាស់ដែនអាកាសលើដែនទឹកអន្តរជាតិ»៕