អ្នកជំនាញអង្គការសហប្រជាជាតិម្នាក់ បានព្រមានកាលពីថ្ងៃពុធថា ភរិយារបស់អតីតនាយករដ្ឋមន្ត្រីប៉ាគីស្ថាន លោក Imran Khan កំពុងត្រូវបានឃុំខ្លួន ក្នុងស្ថានភាពដែលអាចបង្កហានិភ័យធ្ងន់ធ្ងរដល់សុខភាពរាងកាយ និងផ្លូវចិត្តរបស់លោកស្រី។

លោកស្រី Alice Jill Edwards អ្នករាយការណ៍ពិសេសរបស់UN ដែលតាមដានការធ្វើទារុណកម្ម និងការប្រព្រឹត្ត ឬការដាក់ទណ្ឌកម្មដ៏ឃោរឃៅ អមនុស្សធម៌ ឬការរំលោភបំពានផ្សេងទៀត បានជំរុញឲ្យអាជ្ញាធរប៉ាគីស្ថានចាត់វិធានការជាបន្ទាន់ ដើម្បីដោះស្រាយស្ថានការណ៍នេះ។

លោក Khan និងភរិយារបស់ខ្លួន លោកស្រី Bushra Bibi ត្រូវបានកាត់ទោសពីបទពុករលួយ ក្នុងខែមករា ហើយពួកគេ ត្រូវបានកាត់ទោសឲ្យជាប់ពន្ធនាគារ ១៤ ឆ្នាំ និង ៧ ឆ្នាំ រៀងៗខ្លួន។

ចំណែកកាលពីថ្ងៃសៅរ៍សប្តាហ៍មុន តុលាការប៉ាគីស្ថានបានកាត់ទោសពួកគេឲ្យជាប់ពន្ធនាគារ ១៧ ឆ្នាំពីបទពុករលួយពាក់ព័ន្ធនឹងអំណោយដែលអតីតនាយករដ្ឋមន្ត្រីដែលជាប់ពន្ធនាគារ បានទទួលក្នុងពេលកាន់តំណែង។

ទាំងលោក Khan និងលោកស្រី Bibi ត្រូវបានកាត់ទោសឲ្យជាប់ពន្ធនាគារ ១០ ឆ្នាំពីបទរំលោភលើទំនុកចិត្ត និង ៧ ឆ្នាំ ពីបទពុករលួយក្នុងករណីមួយដែលសង្ស័យថា ធ្វើឲ្យប៉ះពាល់ដល់ទំនុកចិត្តរបស់សាធារណជនលើរដ្ឋាភិបាល៕