ក្រុមហ៊ុនអាកាសចរណ៍អន្តរជាតិប៉ាគីស្ថាន (PIA) ត្រូវបានគេរំពឹងថានឹងត្រូវបានគ្រប់គ្រងដោយម្ចាស់ថ្មីចាប់ពីខែមេសាឆ្នាំក្រោយ ហើយទទួលបានទុនថ្មីក្រោមកិច្ចព្រមព្រៀងដើម្បីធ្វើឯកជនភាវូបនីយកម្មក្រុមហ៊ុនអាកាសចរណ៍ជាតិ នេះបើយោងតាមប្រធានផ្នែកឯកជនភាវូបនីយកម្មរបស់ប្រទេសបាននិយាយកាលពីថ្ងៃពុធ ទី២៤ ខែធ្នូ។

សម្ព័ន្ធក្រុមហ៊ុនមួយដឹកនាំដោយសាជីវកម្ម Arif Habib បានបង្ហាញខ្លួនជាអ្នកដេញថ្លៃកំពូលមួយក្នុងការដេញថ្លៃផ្សាយផ្ទាល់តាមទូរទស្សន៍សម្រាប់ភាគហ៊ុន៧៥% នៅក្នុងក្រុមហ៊ុនអាកាសចរណ៍អន្តរជាតិប៉ាគីស្ថាន (PIA) ជាការទម្លាយភាពទាល់ច្រកសម្រាប់ការធ្វើឯកជនភាវូបនីយកម្មរបស់ក្រុមហ៊ុនអាកាសចរណ៍ដែលបានពន្យារពេលជាយូរមករបស់រដ្ឋាភិបាល។

សម្ព័ន្ធក្រុមហ៊ុន Arif Habib បានផ្តល់ប្រាក់ចំនួន១៣៥ពាន់លានរូពី (៤៨២,១៤ លានដុល្លារ) ដែលលើសពីតម្លៃទុនបម្រុងរបស់រដ្ឋាភិបាលចំនួន១០០ពាន់លានរូពី ជាការផ្លាស់ប្តូរច្រើនពីបំណងលក់ដែលបរាជ័យកាលពីឆ្នាំមុន។ លោក Muhammad Ali ទីប្រឹក្សាផ្នែកឯកជនភាវូបនីយកម្មរបស់នាយករដ្ឋមន្ត្រី បានប្រាប់សារព័ត៌មាន Reuters ក្នុងបទសម្ភាសន៍តាមអ៊ីនធឺណិតថា រដ្ឋរំពឹងថាម្ចាស់ថ្មី នឹងដំណើរការក្រុមហ៊ុនអាកាសចរណ៍មួយនេះនៅខែមេសា ដោយអាស្រ័យទៅលើការអនុម័ត។