ប្រធានាធិបតីអាមេរិក លោក Donald Trump បានឆ្លៀតយកឱកាសថ្ងៃមុនបុណ្យណូអែល ដើម្បីវាយប្រហារក្រុមប្រឆាំង គឺគណបក្សប្រជាធិបតេយ្យ ដោយដាក់ឈ្មោះពួកគេថា ជា «ក្រុមគ្មានគំនិតពិចារណាឆ្វេងនិយមជ្រុល» ខណៈដែលលោកបានបង្ហោះសារអបអរ និងជូនពរថ្ងៃបុណ្យនេះ។

ពីគេហដ្ឋានដ៏ស្កឹមស្កៃ Mar-a-Lago របស់លោក នៅរដ្ឋ Florida មេដឹកនាំខាងគណបក្សសាធារណរដ្ឋរូបនេះ បានចំណាយពេលមួយថ្ងៃមុនបុណ្យណូអែល ចែករំលែកអារម្មណ៍រីករាយ នៅថ្ងៃបុណ្យដ៏ធំនេះ។ លោកបានចូលរួមកម្មវិធីប្រពៃណីរបស់ពិធីបុណ្យនេះ គឺការនិយាយទូរសព្ទតាមដានដំណើរលោកតាសាន់តាក្លូសរបស់ NORAD (ទីបញ្ជាការការពារលំហអកាសអាមេរិកខាងជើង) ហើយលោកបានផ្ញើសារអបអរ និងជូនពរបុណ្យណូអែលដល់កងទ័ពអាមេរិកទូទាំងពិភពលោក។

តែលោក Trump មិនបានចែករំលែកភាពរួសរាយរាក់ទាក់ដូចគ្នានេះ ជាមួយនឹងគូប្រជែងគណបក្សប្រជាធិបតេយ្យឡើយ។ លោកបានលើកឡើងនៅលើវេទិកាបណ្ដាញសង្គម Truth Social របស់លោកថា៖ «រីករាយថ្ងៃបុណ្យណូអែលអ្នកទាំងអស់គ្នា ក្នុងនោះរួមទាំងក្រុមមិនចេះគិតពិចារណាឆ្វេងនិយមជ្រុលផងដែរ ដែលកំពុងធ្វើអ្វីគ្រប់យ៉ាងដែលអាចធ្វើបាន ដើម្បីបំផ្លាញប្រទេសរបស់យើង ប៉ុន្តែកំពុងបរាជ័យយ៉ាងធ្ងន់ធ្ងរ»។

លោក Trump បានបន្ថែមថា៖ «យើងលែងបណ្ដោយឲ្យមានការមិនត្រួតពិនិត្យព្រំដែនទៀតទេ លែងមានបុរសទៅប្រកួតក្នុងកីឡារបស់ស្ត្រីទៀតហើយ លែងមានការលើកតម្កើងសិទ្ធិក្រុមស្រឡាញ់ភេទដូចគ្នា ឬមិនមានការអនុវត្តច្បាប់ដ៏ខ្សោយទៀតទេ។ អ្វីដែលយើងមាន គឺទីផ្សារភាគហ៊ុន និងផែនការសន្សំចូលនិវត្តន៍ដ៏ល្អប្រសើរ តួលេខឧក្រិដ្ឋកម្មទាបបំផុត ក្នុងរយៈពេលជាច្រើនទស្សវត្សរ៍ គ្មានអតិផរណា ហើយកាលពីម្សិលមិញ GDP (ផលិតផលក្នុងស្រុកសរុប) គឺ ៤,៣ ពោលគឺមាន ២ពិន្ទុ ល្អជាងការរំពឹងទុក»។

មេដឹកនាំរូបនេះ បានរិះគន់ក្រុមប្រឆាំង ដែលបានរិះគន់រដ្ឋបាលរបស់លោក ជុំវិញការដោះស្រាយការចំណាយនៃការរស់នៅ ពោលគឺមួយថ្ងៃបន្ទាប់ពីទិន្នន័យរបស់ក្រសួងពាណិជ្ជកម្ម បង្ហាញថា សេដ្ឋកិច្ច បានកើនឡើង ៤,៣ភាគរយ នៅក្នុងត្រីមាសទី៣ ដែលជា GDP ខ្ពស់បំផុត ក្នុងរយៈពេល ២ឆ្នាំ៕