សម្តេច ប៉ាប ឡេអូ (Pope Leo) បានមានព្រះបន្ទូលនៅក្នុងឱកាសផ្ដល់ឱវាទបុណ្យណូអែល កាលពីថ្ងៃពុធ (ទី២៤ ខែធ្នូ) ថា ប្រវត្តិនៃព្រះយេស៊ូ ដែលទ្រង់ប្រសូតក្នុងក្រោលសត្វ ព្រោះគ្មានកន្លែងស្នាក់អាស្រ័យ គួរតែរំលឹកដល់គ្រិស្តបរិស័ទថា ការបដិសេធមិនជួយជនក្រីក្រ និងជនដែលយើងមិនស្គាល់ គឺស្មើនឹងការបដិសេធមិនគោរពព្រះអម្ចាស់របស់ខ្លួនឯង។

សម្តេច ប៉ាប ឡេអូ ដែលបានយកការមានព្រះហឫទ័យទុកដាក់ ចំពោះជនអន្តោប្រវេសន៍ និងអ្នកក្រីក្រ ជាប្រធានបទធំនៃតួនាទីសម្តេចប៉ាបដំបូងរបស់ព្រះអង្គ បានមានបន្ទូលថា កំណើតរបស់ព្រះយេស៊ូ បានបង្ហាញពីវត្តមានរបស់ព្រះអម្ចាស់ នៅក្នុងចំណោមមនុស្សគ្រប់រូប នៅពេលដែលសម្ដេចសង្ឃកាតូលិកអង្គនេះ បានដឹកនាំបរិស័ទចំនួន ១,៤ពាន់លាននាក់របស់ពិភពលោកចូលទៅក្នុងការចាប់ផ្ដើមបុណ្យណូអែល នៅឯវិហារ St Peter's Basilica។

ក្នុងអំឡុងពេលប្រារព្ធពិធីបុណ្យយ៉ាងឱឡារិកអធិកអធម ដែលមានអ្នកចូលរួមប្រមាណ ៦.០០០នាក់ នៅក្នុងវិហារនេះ សម្តេច ប៉ាប បានមានព្រះបន្ទូលថា «នៅលើផែនដីនេះគ្មានកន្លែង សម្រាប់ព្រះអម្ចាស់ទេ ប្រសិនបើគ្មានកន្លែង សម្រាប់មនុស្សលោក។ ការបដិសេធនណារមា្នក់ គឺជាការបដិសេធអ្នកផ្សេងទៀត»។

គួរបញ្ជាក់ថា សម្តេច ប៉ាប ឡេអូ ដែលជាសម្តេចប៉ាបមានដើមកំណើតអាមេរិកទី១ កំពុងប្រារព្ធពិធីបុណ្យណូអែលដំបូងរបស់ព្រះអង្គ បន្ទាប់ពីត្រូវបានបោះឆ្នោតជ្រើសរើស កាលពីខែឧសភា ឲ្យស្នងតំណែងសម្តេច ប៉ាប ហ្វ្រង់ស៊ីស ដែលបានចូលទិវង្គត៕