នគរបាលអូស្ត្រាលី កំពុងស៊ើបអង្កេត «អគ្គិភ័យដ៏គួរឲ្យសង្ស័យ» បន្ទាប់ពីរថយន្តដែលមានស្លាកសញ្ញាប្រារព្ធពិធីបុណ្យ Hanukkah របស់ជនជាតិជ្វីហ្វ ត្រូវបានដុតឲ្យឆេះ នៅថ្ងៃព្រហត្បតិ៍ (ទី២៥ ខែធ្នូ) នេះ នៅទីក្រុង Melbourne។

រូបភាពនៅលើទូរទស្សន៍ជាតិ ABC បានបង្ហាញឲ្យឃើញថា រថយន្តគ្មានមនុស្សជិះនៅក្នុងនោះ ដែលមានស្លាកសញ្ញា «Happy Chanukah» ជាប់នៅលើដំបូល ត្រូវបានឆាបឆេះដោយសារអគ្គិភ័យ ខណៈចតនៅផ្លូវចូលផ្ទះ។

នគរបាលរដ្ឋ Victoria បានឲ្យដឹងនៅក្នុងសេចក្តីថ្លែងការណ៍មួយថា រថយន្តនោះត្រូវបានឆាបឆេះ នៅព្រឹកព្រលឹមថ្ងៃទី២៥ ខែធ្នូនេះ នៅជាយក្រុង St Kilda East នៃទីក្រុង Melbourne ដោយពណ៌នាថា វាជា «អគ្គិភ័យដ៏គួរឲ្យសង្ស័យ»។ អ្នករស់នៅក្នុងផ្ទះត្រូវបានជម្លៀសចេញ ដើម្បីជាការបង្ការ។

នគរបាលបានបញ្ជាក់ថា៖ «អ្នកស៊ើបអង្កេត បានកំណត់អត្តសញ្ញាណមនុស្សម្នាក់ ដែលអាចជួយដល់ការស៊ើបអង្កេតរបស់ខ្លួនបាន ហើយពួកគេកំពុងស្វែងរកយ៉ាងសកម្ម និងសាកសួរ អំពីកន្លែងលាក់ខ្លួនរបស់ជនទាំងនោះ»។

គួរបញ្ជាក់ថា អាជ្ញាធរអូស្ត្រាលីកំពុងពង្រឹងច្បាប់ និងការផ្តន្ទាទោស ចំពោះឧក្រិដ្ឋកម្មស្អប់ខ្ពើម បន្ទាប់ពីការបាញ់ប្រហារសម្លាប់មនុស្សដ៏ច្រើន កាលពីថ្ងៃទី១៤ ខែធ្នូ អំឡុងពិធីបុណ្យ Hanukkah នៅលើឆ្នេរ Bondi បានបណ្ដាលឲ្យមនុស្ស ១៥នាក់បាត់បង់ជីវិត៕