អ្នកនាំពាក្យក្រសួងការពារជាតិ លោក Zhang Xiaogang បាននិយាយថា នៅឆ្នាំ ២០២៥ កងទ័ពរំដោះប្រជាជនចិន (PLA) បានពង្រឹងការសន្ទនាជាយុទ្ធសាស្ត្ររបស់ខ្លួនជាមួយរុស្ស៊ី សហរដ្ឋអាមេរិក និងសហភាពអឺរ៉ុប។

លោកបានថ្លែងប្រាប់អ្នកសារព័ត៌មានថា៖ «នៅឆ្នាំនេះ ការទូតយោធារបស់ប្រទេសចិន នៅតែមានទំនាក់ទំនងយ៉ាងជិតស្និទ្ធទៅនឹងអាទិភាពរួមរបស់រដ្ឋ និងបក្ស ហើយត្រូវបានធ្វើឡើង ស្របតាមគោលការណ៍ណែនាំជាយុទ្ធសាស្ត្ររបស់ថ្នាក់ដឹកនាំជាន់ខ្ពស់ ។ ការផ្តោតសំខាន់ គឺទៅលើការត្រៀមខ្លួនប្រយុទ្ធ»។ មន្ត្រីការពារជាតិរូបនេះ បានចង្អុលបង្ហាញថា៖«ទី១ យើងបានពង្រឹងកិច្ចសហប្រតិបត្តិការជាយុទ្ធសាស្ត្រជាមួយរុស្ស៊ី សហរដ្ឋអាមេរិក និងអឺរ៉ុប»។

លោក Zhang Xiaogang បានរំលឹកថា នៅឆ្នាំ ២០២៥ គណៈប្រតិភូមួយក្រុមមកពីគណៈកម្មការយោធាមជ្ឈិមចិនបានធ្វើទស្សនកិច្ចនៅប្រទេសរុស្ស៊ី។ លោកបានលើកឡើងពីព្រឹត្តិការណ៍សំខាន់ៗ ដូចជាកិច្ចប្រជុំខែមិថុនារបស់រដ្ឋមន្ត្រីការពារជាតិនៃអង្គការសហប្រតិបត្តិការសៀងហៃនៅទីក្រុង Qingdao ភាគខាងកើតប្រទេសចិន និងសមយុទ្ធកងទ័ពជើងទឹករួមគ្នារវាងកងកម្លាំងប្រដាប់អាវុធចិន និងរុស្ស៊ី និងការល្បាតផ្លូវអាកាសជាយុទ្ធសាស្ត្ររបស់ពួកគេ។

យោងតាមអ្នកនាំពាក្យរូបនេះ បានឲ្យដឹងថា ក្នុងអំឡុងពេលសមយុទ្ធទាំងនេះ កងទ័ពរំដោះប្រជាជនចិន (PLA) បានដើរតួនាទីយ៉ាងសកម្ម និងបានខិតខំប្រឹងប្រែងដើម្បី «កំណត់ និងផ្តួចផ្តើមវិស័យថ្មីៗ» ក្នុងកិច្ចសហប្រតិបត្តិការ៕