​បាល់ទាត់៖ ​អ្នកចាត់ការ​ហង្ស​ក្រហម Liverpool លោក Jurgen Klopp បាន​កោតសរសើរ​ខ្សែប្រយុទ្ធ Takumi Minamino ពេញៗ​មាត់ បន្ទាប់ពី​កីឡាករ​ជប៉ុន​រូបនេះ​រកបាន​ពីរ​គ្រាប់​ម្នាក់ឯង​ឱ្យ Liverpool យកឈ្នះ Norwich City ២-១ ឡើង​វគ្គ ៨ក្រុម​ចុងក្រោយ FA Cup​។

​​Liverpool មុន​មកជួប Norwich នេះ​ទើបតែ​បាន​លើក​ពាន Carabao Cup ក្រោយ​យកឈ្នះ Chelsea ដោយបាល់ ១១ម៉ែត្រ​កាត់សេចក្តី ​ខណៈដែល Minamino គឺជា​កីឡាករ​បម្រុង​ដែល​មិន​ត្រូវបាន​ប្រើប្រាស់​ក្នុង​ប្រកួត​នោះ​។ មក​ដល់​ការប្រកួត​នេះ​អតីត​ខ្សែប្រយុទ្ធ Red Bull Salzburg រកបាន​ពីរ​គ្រាប់​ម្នាក់ឯង​ក្នុង​វគ្គ​ទី១ នៅ​នាទី​ទី២៧ និង ៣៩ ខណៈ Norwich តប​បាន​មួយ​គ្រាប់​វិញ​នៅ​វគ្គ​ទី២ ដោយ Lukas Rupp​។ ​ជ័យជំនះ​នេះ​មានន័យថា​ ក្រុម​របស់លោក Jurgen Klopp បាន​យកឈ្នះ Norwich City បួន​លើក​ហើយ​រដូវ​កាល​នេះ​ដែល​រួមមាន​ពីរ​ជើង​នៅ Premier League មួយ​ប្រកួត​នៅ Carabao Cup ជុំ​ទី៣ និង​យប់មិញ​នេះ​។

​​ងាក​មក​ប្រកួត​ផ្សេងទៀត​យប់មិញ​ដែរ តោ​ខៀវ Chelsea បាន​យកឈ្នះ​នៅ​ទឹកដី Luton Town ៣-២​។ ​​ក្រុម​ម្ចាស់ផ្ទះ Luton នាំមុខ​ដល់​ទៅ​ពីរលើក​ ខណៈដែល Saul Niguez និង Timo Werner ជា​អ្នក​តាម​ស្មើ​ទាំង​ពីរលើក​។ ក្រោយ​មក​ខ្សែប្រយុទ្ធ​ប៊ែ​ល​ហ្ស៊ិ​ក Romelu Lukaku គឺជា​អ្នកសំរេច​គ្រាប់​បាល់​ជ័យជំនះ​ឱ្យ Chelsea នៅ​នាទី​ទី៧៨​។ ​ជ័យជំនះ​របស់ Chelsea ក៏​ស្របពេល​នឹង​ម្ចាស់​ក្លិប​លោក Roman Abramovich ប្រកាស​លក់​ក្លិប​ផងដែរ​ដោយសារ​បញ្ហា​រុស្ស៊ី​-​អ៊ុយ​ក្រែ​ន​។ ​គូ​ចុងក្រោយ​គេ​នេះ ក្រុម​ដែល​កំពុងមាន​ទំរង់​លេង​ឡើង Southampton យកឈ្នះ West Ham ៣-១៕

​អត្ថបទ​៖​នាង សុភា​វុ​ធ