អាជ្ញាធរស៊ីរី នៅថ្ងៃព្រហស្បតិ៍ (ទី២៥ ខែធ្នូ) នេះ បានប្រាប់ឲ្យដឹងថា ពួកគេបានសម្លាប់មេដឹកនាំជាន់ខ្ពស់មួយរូប នៅក្នុងក្រុម ISIS ក្នុងកិច្ចសហប្រតិបត្តិការជាមួយក្រុមចម្រុះដឹកនាំដោយសហរដ្ឋអាមេរិក ពោលគឺប៉ុន្មានម៉ោងបន្ទាប់ពីមានការចាប់ខ្លួនមេដឹកនាំម្នាក់ទៀត នៅជិតទីក្រុងដាម៉ាស។

កងកម្លាំងសន្តិសុខ និងចារកម្មរបស់ប្រទេសស៊ីរី ដែលធ្វើការក្នុងកិច្ចសហប្រតិបត្តិការជាមួយក្រុមចម្រុះអន្តរជាតិ បានអនុវត្តនូវអ្វីដែលក្រសួងមហាផ្ទៃបានពិពណ៌នាថា ជា «ប្រតិបត្តិការសន្តិសុខច្បាស់លាស់ជាក់លាក់»។

អាជ្ញាធរបានបញ្ជាក់ថា៖ «ប្រតិបត្តិការនេះបាននាំឲ្យមានការបញ្ចប់ជីវិតរបស់ភេរវករឈ្មោះ Mohammad Shahada ដែលគេស្គាល់ថា ជា Abu Omar Shaddad ដែលត្រូវបានគេចាត់ទុកថា ជាមេដឹកនាំរបស់ ISIS ដ៏លេចធ្លោម្នាក់ នៅក្នុងប្រទេសស៊ីរី។ ប្រតិបត្តិការនេះកើតឡើងដែលជាការបញ្ជាក់ពីប្រសិទ្ធភាពនៃការមានប្រតិបត្តិការរួមគ្នា រវាងភ្នាក់ងារសន្តិសុខជាតិ និងដៃគូអន្តរជាតិ»។

នៅប៉ុន្មានម៉ោងមុននេះ អាជ្ញាធរ បានឲ្យដឹងថា ពួកគេបានចាប់ខ្លួនលោក Taha al-Zoubi ដែលត្រូវបានគេស្គាល់ថា Abu Omar Tabiya ដែលជាមេដឹកនាំក្រុម ISIS នៅទីក្រុងដាម៉ាស រួមជាមួយនឹងកូនចៅរបស់គេជាច្រើននាក់ កាលពីថ្ងៃពុធ។

គួរបញ្ជាក់ថា ការវាយប្រហារកាលពីថ្ងៃទី១៣ ខែធ្នូ បានសម្លាប់ទាហានអាមេរិក ២នាក់ និងជនស៊ីវិលអាមេរិកម្នាក់។ ទីក្រុងវ៉ាស៊ីនតោន បានដាក់ការទទួលខុសត្រូវ ចំពោះការវាយប្រហារនេះ ទៅលើខ្មាន់កាំភ្លើងរបស់ក្រុម IS តែមួយគត់ នៅក្នុងទីក្រុង Palmyra របស់ប្រទេសស៊ីរី។ ជាការសងសឹក កងកម្លាំងអាមេរិក បានធ្វើការវាយប្រហារលើគោលដៅជាច្រើនរបស់ក្រុម ISIS នៅស៊ីរី។ ហើយបើយោងតាមអង្គការឃ្លាំមើលសិទ្ធិមនុស្សស៊ីរី បានឲ្យដឹងថា ការវាយប្រហារទាំងនោះបានផ្ដាច់ជីវិតសមាជិក ៥នាក់របស់ក្រុមជីហាដ៕