ប្រធានាធិបតីអ៊ុយក្រែន លោក Volodymyr Zelenskyy បាននិយាយកាលពីថ្ងៃព្រហស្បតិ៍ (២៥ ធ្នូ) ថា លោកបានធ្វើកិច្ចសន្ទនាតាមទូរសព្ទជាមួយប្រេសិតពិសេសរបស់លោកប្រធានាធិបតីអាមេរិក Donald Trump គឺលោក Steve Witkoff និងកូនប្រសារលោក Trump គឺលោក Jared Kushner អស់រយៈពេលប្រហែល ១ម៉ោង អំពីមធ្យោបាយដើម្បីបញ្ចប់សង្គ្រាមជាមួយរុស្ស៊ី។

ក្នុងការបង្ហោះលើកម្មវិធីផ្ញើសារតេលេក្រាម លោក Zelenskyy បាននិយាយថា “នោះពិតជាកិច្ចសន្ទនាដ៏ល្អមួយ៖ មានព័ត៌មានលម្អិតជាច្រើន គំនិតល្អៗ ដែលភាគីទាំងពីរបានពិភាក្សា ហើយក៏មានគំនិតថ្មីៗមួយចំនួនអំពីមធ្យោបាយនាំយកសន្តិភាពពិតប្រាកដ ឱ្យខិតមកកាន់តែជិត ហើយនោះគឺទាក់ទងនឹងទម្រង់ កិច្ចប្រជុំ និងជាពិសេស ពេលវេលាកំណត់”។

លោក Trump កំពុងតែជំរុញឱ្យមានកិច្ចព្រមព្រៀងមួយដើម្បីបញ្ចប់សង្គ្រាមអាយុកាលជិត ៤ឆ្នាំមកនេះ ហើយប៉ុន្មានសប្តាហ៍ថ្មីៗនេះ កិច្ចប្រឹងប្រែងសន្តិភាពដែលដឹកនាំដោយលោក Witkoff និងលោក Kushner បាននិងកំពុងរីកចម្រើនបន្តិចម្តងៗ។ កាលពីដើមសប្តាហ៍នេះ លោក Zelenskyiy បានបើកបង្ហាញសេចក្តីព្រាងផែនការសន្តិភាព ២០ចំណុច ដែលលោកពិពណ៌នាថា ជាក្របខណ្ឌសំខាន់សម្រាប់បញ្ចប់សង្គ្រាម។

សេចក្តីព្រាងនេះ តំណាងឱ្យកំណែថ្មីនៃផែនការដើម ២៨ចំណុច ដែលសហរដ្ឋអាមេរិក ធ្លាប់បានពិភាក្សាជាមួយភាគីរុស្ស៊ី។ យ៉ាងណាក៏ដោយ លោក Zelenskyy បានសង្កត់ធ្ងន់ថា សំណួរសំខាន់ៗអំពីបញ្ហាទឹកដី នៅតែមិនទាន់ដោះស្រាយបានទេ នៅក្នុងសេចក្តីព្រាង ២០ចំណុចថ្មីនោះ ដោយអំពាវនាវឱ្យមានកិច្ចប្រជុំជាមួយលោក Trump ដើម្បីដោះស្រាយបញ្ហាដ៏រសើបបំផុតបែបនេះ៕