យោធាអ៊ីស្រាអែល បាននិយាយកាលពីថ្ងៃព្រហស្បតិ៍ (២៥ ធ្នូ) ថា កងកម្លាំងរបស់ខ្លួនបានសម្លាប់សមាជិកម្នាក់នៃកងកម្លាំង គុត (Quds) របស់អ៊ីរ៉ង់ នៅក្នុងប្រទេសលីបង់ ដែលបានចូលរួមក្នុងការរៀបចំផែនការវាយប្រហារចេញពីប្រទេសស៊ីរី និងលីបង់។ 

យោធាអ៊ីស្រាអែល បានកំណត់អត្តសញ្ញាណបុរសនោះថា ឈ្មោះ Hussein Mahmoud Marshad al-Jawhari ដោយហៅបុគ្គលនេះថាជាភ្នាក់ងារសំខាន់ម្នាក់ក្នុងអង្គភាពលេខ ៨៤០ របស់កម្លាំងគុត។

ក្នុងសេចក្ដីថ្លែងការណ៍មួយ យោធាអ៊ីស្រាអែលបានបន្ថែមថា លោក Al-Jawhari ត្រូវបានធ្វើឃាតក្នុងតំបន់នោះ ឬអាចនៅតំបន់ Ansariyeh ដោយមិនលម្អិតបន្ថែមអំពីការស្លាប់នេះឡើយ។ សេចក្តីថ្លែងការណ៍បន្តថា លោក Al-Jawhari «បានធ្វើប្រតិបត្តិការក្រោមកងឆ្មាំបដិវត្តន៍អ៊ីស្លាម (IRGC) ហើយជាប់ពាក់ព័ន្ធនឹងសកម្មភាពភេរវកម្ម ដែលដឹកនាំដោយអ៊ីរ៉ង់ ប្រឆាំងនឹងរដ្ឋអ៊ីស្រាអែល និងកងកម្លាំងសន្តិសុខរបស់ខ្លួន»។

ទាំងអ៊ីរ៉ង់ និងលីបង់ មិនទាន់ចេញការអត្ថាធិប្បាយលើការអះអាងនេះទេ។ គួរឱ្យដឹងថា អ៊ីស្រាអែល និងអ៊ីរ៉ង់ បានប្រយុទ្ធគ្នាក្នុងសង្គ្រាមខ្លីមួយកាលពីខែមិថុនា ហើយយោធាអ៊ីស្រាអែល បានធ្វើការវាយប្រហារនៅលីបង់ ស្ទើរតែរាល់ថ្ងៃ ក្នុងអ្វីដែលខ្លួននិយាយថា ជាកិច្ចប្រឹងប្រែងដើម្បីបញ្ឈប់ក្រុមហេសបូឡា ដែលគាំទ្រដោយអ៊ីរ៉ង់ផងដែរ មិនឱ្យការកសាងសមត្ថភាពយោធាឡើងវិញ៕