ទីភ្នាក់ងារអាកាសធាតុរបស់ជប៉ុន នៅថ្ងៃសុក្រ (២៦ ធ្នូ) នេះ បានព្រមានអំពីខ្យល់បក់ខ្លាំង ព្យុះព្រិល និងរលកសមុទ្រខ្ពស់ៗនៅភាគខាងលិច ខាងកើត និងឦសាននៃប្រទេសជប៉ុន ជាមួយនឹងលទ្ធភាពនៃរន្ទះបាញ់ ព្យុះកួច បំណាក់ដី និងការរំខានចរាចរណ៍យ៉ាងទូលំទូលាយ។

ទីភ្នាក់ងារឧតុនិយមបានឱ្យដឹងថា ភាគខាងលិចប្រទេសជប៉ុន ត្រូវបានព្យាករថា នឹងប្រជួបប្រទះអាកាសធាតុមិនល្អនៅថ្ងៃដដែលនោះ ខណៈផ្នែកភាគខាងកើត និងភាគឦសាននៃប្រទេស ត្រូវបានរំពឹងថា នឹងជួបប្រទះអាកាសធាតុអាក្រក់រហូតដល់ថ្ងៃសៅរ៍ ទី២៧ ខែធ្នូ ចុងសប្ដាហ៍នេះ ក្រោមគំរូសម្ពាធរដូវរងាយ៉ាងខ្លាំងក្លា។

ទីភ្នាក់ងារសារព័ត៌មាន KYODO បានរាយការណ៍ថា ក្នុងពេល ២៤ ម៉ោងរហូតដល់ព្រឹកថ្ងៃទី ២៧ ខែធ្នូ ស្អែកនេះ (ពេលវេលាក្នុងស្រុក) ព្រិលអាចធ្លាក់យ៉ាងខ្លាំងក្លាកម្រាស់រហូតដល់ ៨០ សង់ទីម៉ែត្រ នៅតំបន់ Hokuriku ភាគកណ្តាលប្រទេសជប៉ុន ខណៈតំបន់ Tohoku ដែលនៅភាគឦសាន ក៏អាចមានព្រិលធ្លាក់កម្រាស់រហូតដល់ ៧០ សង់ទីម៉ែត្រផងដែរ។

លើសពីនេះ ទីភ្នាក់ងារឧតុនិយមជប៉ុន បាននិយាយថា ព្រិលធ្លាក់ក្រាស់ៗក៏អាចកើតមាននៅតំបន់ Kanto-Koshin ទីក្រុងតូក្យូ រួមទាំងតំបន់ផ្សេងទៀតផងដែរ ស្ទើរនៅទូទាំងប្រទេស៕