ទីប្រឹក្សាជាន់ខ្ពស់ម្នាក់របស់ប្រធានាធិបតីស៊ីរីកាលពីថ្ងៃព្រហស្បតិ៍ បានព្រមានថា ជម្រើសជាមួយកងកម្លាំងប្រជាធិបតេយ្យស៊ីរី (SDF)ដែលដឹកនាំដោយជនជាតិឃើដ កំពុងរួមតូច ខណៈដែលភាពតានតឹង នៅតែបន្តកើតមាន បន្ទាប់ពីការប៉ះទង្គិចគ្នាថ្មីៗនេះ នៅទីក្រុងអាឡេប៉ូ និងការពន្យារពេលក្នុងការអនុវត្តកិច្ចព្រមព្រៀងដ៏សំខាន់មួយកាលពីខែមីនា ដែលមានគោលបំណងធ្វើសមាហរណកម្មក្រុមនេះ ទៅក្នុងរដ្ឋស៊ីរីថ្មី។

លោក Ahmed Mouaffaq Zidan ទីប្រឹក្សាប្រព័ន្ធផ្សព្វផ្សាយរបស់ប្រធានាធិបតីបណ្តោះអាសន្នស៊ីរី លោក Ahmed al-Sharaa បានលើកឡើងនៅក្នុងការបង្ហោះមួយនៅលើវេទិកាប្រព័ន្ធផ្សព្វផ្សាយសង្គម X ថា កងកម្លាំងប្រជាធិបតេយ្យស៊ីរី (SDF) ត្រូវតែទទួលខុសត្រូវចំពោះការខកខានមិនគោរពការប្តេជ្ញាចិត្តដែលខ្លួនបានចុះហត្ថលេខា នៅថ្ងៃទី ១០ ខែមីនា នៅចំពោះមុខតួអង្គអន្តរជាតិ រួមទាំងប្រទេសទួរគី និងសហរដ្ឋអាមេរិក។

លោក Zidan បាននិយាយថា៖«ជម្រើសជាមួយកងកម្លាំង SDF បានរួមតូច ហើយកងកម្លាំងនេះ ត្រូវតែទទួលខុសត្រូវចំពោះការមិនបំពេញអ្វីដែលខ្លួនបានចុះហត្ថលេខា» ដោយសំដៅទៅលើកិច្ចព្រមព្រៀងដែលសម្រេចបានកាលពីដើមឆ្នាំនេះ ក្នុងគោលបំណងស្វែងរកការត្រួសត្រាយផ្លូវសម្រាប់ការធ្វើ សមាហរណកម្ម ការបន្ធូរបន្ថយភាពតានតឹង និងការបង្រួបបង្រួមទឹកដីស៊ីរី។

លោកបានបន្ថែមថា កិច្ចព្រមព្រៀងនេះ ត្រូវបានបញ្ចប់ក្រោមការធានារបស់អន្តរជាតិ និងឆ្លុះបញ្ចាំងពីការឯកភាពគ្នាកាន់តែទូលំទូលាយរបស់ស៊ីរី ជុំវិញផ្លូវអន្តរកាលរបស់ប្រទេសនេះ៕