សមាជិកសភានៅប្រទេសអាល់ហ្សេរី បានបោះឆ្នោតប្រកាសថា អាណានិគមនិយមបារាំង នៅក្នុងប្រទេសអាហ្វ្រិកខាងជើង គឺជាឧក្រិដ្ឋកម្ម ដោយអនុម័តច្បាប់មួយដែលអំពាវនាវឲ្យមានការសងទ្រព្យសម្បត្តិដែលបារាំងបានយកក្នុងអំឡុងពេលគ្រប់គ្រងរយៈពេល ១៣០ឆ្នាំ របស់ខ្លួន ក្នុងចំណោមការទាមទារផ្សេងទៀតដែលស្វែងរកការដោះស្រាយកំហុសប្រវត្តិសាស្ត្រ។

ប្រទេសបារាំងបានរិះគន់ច្បាប់នេះថា ជា «ទង្វើអរិភាព» ដែលគំរាមកំហែងដល់កិច្ចខិតខំប្រឹងប្រែងទ្វេភាគី ដើម្បីព្យាបាលរបួសពីអតីតកាល។ ប្រទេសទាំងពីរបានរក្សាទំនាក់ទំនងវប្បធម៌ និងសេដ្ឋកិច្ចជិតស្និទ្ធ ប៉ុន្តែ ទំនាក់ទំនងការទូតមានបញ្ហា។

នៅក្នុងពិធីដ៏ឧឡារិកមួយដែលជានិមិត្តរូប សមាជិក ៣៤០ រូប ក្នុងចំណោម ៤០៧ រូប នៃរដ្ឋសភាអាល់ហ្សេរី បានបោះឆ្នោតកាលពីយប់ថ្ងៃពុធ ដើម្បីអនុម័តច្បាប់នេះ។ ការសម្រេចនេះ បានកើតឡើងត្រឹមតែប៉ុន្មានសប្តាហ៍ប៉ុណ្ណោះ បន្ទាប់ពីប្រទេសអាហ្វ្រិកនេះ បានធ្វើសេចក្តីសម្រេចរួមមួយសម្រាប់ការទទួលស្គាល់ និងសំណងសម្រាប់ឧក្រិដ្ឋកម្មសម័យអាណានិគម។

ច្បាប់នេះគ្របដណ្តប់លើរយៈពេលពីការចុះចតរបស់កងទ័ពនៃព្រះមហាក្សត្រ Charles X នៅលើឆ្នេរ Sidi Ferruch ភាគខាងលិចនៃប្រទេសអាល់ហ្សេរី ក្នុងឆ្នាំ ១៨៣០ ដល់ថ្ងៃទី ០៥ ខែកក្កដា ឆ្នាំ ១៩៦២ ដែលជាថ្ងៃឯករាជ្យជាផ្លូវការរបស់ប្រទេសនេះ។

ច្បាប់នេះចែងអំពីការប្រគល់ឯកសារសំខាន់និងទ្រព្យសម្បត្តិរបស់អាល់ហ្សេរីដែលបានបញ្ជូនទៅប្រទេសបារាំង ក្នុងអំឡុងសម័យអាណានិគម និងការបញ្ជូនផែនទីលម្អិតនៃការសាកល្បងនុយក្លេអ៊ែររបស់បារាំងដែលបានធ្វើឡើងនៅក្នុងប្រទេសអាល់ហ្សេរី ពីឆ្នាំ ១៩៦០ ដល់ឆ្នាំ ១៩៦៦ ដោយអំពាវនាវឲ្យមានការបញ្ជូនត្រឡប់មកប្រទេសវិញនូវអដ្ឋិធាតុរបស់យុទ្ធជនតស៊ូអាល់ហ្សេរីមួយចំនួន ដែលត្រូវបានយកទៅប្រទេសបារាំងផងដែរ៕