អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បាននិយាយកាលពីថ្ងៃព្រហស្បតិ៍ (២៥ ធ្នូ) ថា ប្រទេសរុស្ស៊ី មើលឃើញវឌ្ឍនភាពយឺតៗ ប៉ុន្តែមានស្ថិរភាព នៅក្នុងកិច្ចចរចាសន្តិភាពជាមួយសហរដ្ឋអាមេរិក ស្តីពីបញ្ហាអ៊ុយក្រែន។

លោកស្រី Zakharova បានលើកឡើងថា «ក្នុងដំណើរការចរចាស្តីពីការដោះស្រាយជម្លោះអ៊ុយក្រែន ពោលគឺ ក្នុងដំណើរការចរចាជាមួយសហរដ្ឋអាមេរិក កំពុងមានវឌ្ឍនភាពយឺតៗ ប៉ុន្តែមានស្ថិរភាព»។ លោកស្រីបន្ថែមថា មហាអំណាចអឺរ៉ុបខាងលិច កំពុងព្យាយាមបំផ្លាញវឌ្ឍនភាពនេះ ហើយបានស្នើឱ្យសហរដ្ឋអាមេរិក ជំទាស់នឹងជំហានបែបនេះ។

ប្រធានាធិបតីអាមេរិក លោក Donald Trump កំពុងជំរុញឱ្យមានកិច្ចព្រមព្រៀងមួយដើម្បីបញ្ចប់សង្គ្រាមអាយុកាលជិត ៤ឆ្នាំមកនេះ ហើយប៉ុន្មានសប្តាហ៍ថ្មីៗនេះ កិច្ចប្រឹងប្រែងសន្តិភាពដែលដឹកនាំដោយប្រេសិតអាមេរិក បាននិងកំពុងរីកចម្រើនបន្តិចម្តងៗ។

នៅដើមសប្តាហ៍នេះ មេដឹកនាំអ៊ុយក្រែន លោក Volodymyr Zelenskyy បានបើកបង្ហាញសេចក្តីព្រាងផែនការសន្តិភាព ២០ចំណុច ដែលលោកពិពណ៌នាថា ជាក្របខណ្ឌសំខាន់សម្រាប់បញ្ចប់សង្គ្រាម។ រុស្ស៊ីតែងនិយាយថា មេដឹកនាំអឺរ៉ុប មានបំណងចង់រារាំងកិច្ចចរចាសន្តិភាព ដោយការដាក់ចេញនូវលក្ខខណ្ឌដែលពួកគេដឹងច្បាស់ថា នឹងមិនអាចទទួលយកឡើយបានចំពោះរុស្ស៊ី៕