លោក Liu Pengyu អ្នកនាំពាក្យស្ថានទូតចិនប្រចាំសហរដ្ឋអាមេរិក បានប្រាប់សារព័ត៌មាន TASS ថាប្រទេសចិនចាប់អារម្មណ៍ក្នុងការធ្វើការរួមគ្នាជាមួយប្រទេសដទៃទៀត ដើម្បីពង្រឹង និងអភិវឌ្ឍន៍ប្រព័ន្ធគ្រប់គ្រងអាវុធអន្តរជាតិ ដែលអង្គការសហប្រជាជាតិដើរតួនាទីនាំមុខគេ។ 

លោក Liu Pengyu បានសង្កត់ធ្ងន់ថា៖«ប្រទេសចិនមានឆន្ទៈក្នុងការធ្វើការជាមួយប្រទេសដែលស្រឡាញ់សន្តិភាពទាំងអស់ ដើម្បីតស៊ូមតិសម្រាប់ពិភពលោកពហុប៉ូលដែលស្មើភាពគ្នា និងមានសណ្តាប់ធ្នាប់ និងសកលភាវូបនីយកម្មសេដ្ឋកិច្ចបរិយាប័ន្ន ពង្រឹង និងអភិវឌ្ឍប្រព័ន្ធគ្រប់គ្រងអាវុធអន្តរជាតិ ដែលមានUN ដើរតួនាទីសំខាន់ និងរួមគ្នាកសាងសហគមន៍នៃអនាគតរួមគ្នាសម្រាប់មនុស្សជាតិ»។

លោកបានធ្វើអត្ថាធិប្បាយនេះ ដើម្បីឆ្លើយតបទៅនឹងការអះអាងដែលមាននៅក្នុងរបាយការណ៍របស់មន្ទីរបញ្ចកោណដែលបានចេញផ្សាយថ្មីៗនេះ ស្តីពីការអភិវឌ្ឍរបស់កងទ័ពចិន ដែលបានអះអាងថា ទីក្រុងប៉េកាំងមិនទាន់បានបង្ហាញពីការត្រៀមខ្លួនរួចជាស្រេចសម្រាប់ការពិភាក្សាដ៏ទូលំទូលាយលើការគ្រប់គ្រងអាវុធ នៅឡើយទេ។

អ្នកការទូតរូបនេះ បានបន្ថែមថា៖«ក្នុងនាមជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ និងជារដ្ឋដែលមានអាវុធនុយក្លេអ៊ែរប្រកបដោយការទទួលខុសត្រូវ ប្រទេសចិនតែងតែប្រកាន់ខ្ជាប់នូវមាគ៌ានៃការអភិវឌ្ឍដោយសន្តិវិធី បន្តគោលនយោបាយមិនប្រើប្រាស់អាវុធនុយក្លេអ៊ែរជាមុន រក្សាយុទ្ធសាស្ត្រនុយក្លេអ៊ែរការពារ រក្សាកងកម្លាំងនុយក្លេអ៊ែររបស់ខ្លួនឲ្យនៅកម្រិតអប្បបរមា ដែលត្រូវការសម្រាប់សន្តិសុខជាតិ និងគោរពតាមការប្តេជ្ញាចិត្តរបស់ខ្លួនចំពោះការផ្អាកការធ្វើតេស្តនុយក្លេអ៊ែរ»។

លោកបានសង្កត់ធ្ងន់ថា៖«របាយការណ៍របស់រដ្ឋាភិបាលស្តីអី «ការគ្រប់គ្រងអាវុធ ការរំសាយអាវុធ និងការមិនរីកសាយអាវុធរបស់ប្រទេសចិន នៅក្នុងយុគសម័យថ្មី» ដែលចេញផ្សាយកាលពីខែមុន គឺជាវិធានការជាក់ស្តែងមួយ ដែលប្រទេសចិនបានធ្វើឡើង ដើម្បីអនុវត្តយ៉ាងសកម្មនូវគំនិតផ្តួចផ្តើមសន្តិសុខសកល និងគំនិតផ្តួចផ្តើមអភិបាលកិច្ចសកល»៕