ខណៈដែលរបបសឹកមីយ៉ាន់ម៉ា កំពុងត្រៀមខ្លួនសម្រាប់ដំណាក់កាលដំបូងនៃការបោះឆ្នោតសកល នៅថ្ងៃអាទិត្យ (២៨ ធ្នូ) ខាងមុខនេះ ក្រុមអ្នកវិភាគបានចាត់ទុកថា ចំណាត់ការរបស់មេដឹកនាំយោធា លោក មីន អ៊ុងលាំង និងមន្ត្រីរបស់លោកគឺដើម្បីស្វែងរកភាពស្របច្បាប់ពីបរទេស បន្ទាប់ពីត្រូវបានសហគមន៍អន្តរជាតិរិះគន់ចាប់តាំងពីរដ្ឋប្រហារឆ្នាំ២០២១ មក ប៉ុន្តែទំនងជាមិននាំមកនូវអ្វីថ្មីនោះឡើយ។

គួរឱ្យដឹងថា ការបោះឆ្នោតនៅមីយ៉ាន់ម៉ា នឹងធ្វើឡើងជា ៣ដំណាក់កាល ពោលគឺ នៅថ្ងៃអាទិត្យ (២៨ ធ្នូ) នៅថ្ងៃទី១១ ខែមករា ឆ្នាំ២០២៦ និងនៅថ្ងៃទី២៥ ខែមករា ឆ្នាំដដែលនេះ។ លោក មីន អ៊ុងលាំង ធ្លាប់បានទទួលស្គាល់រួចមកហើយថា ការបោះឆ្នោតនេះនឹងមិនត្រូវបានធ្វើឡើងទូទាំងប្រទេសទេ ដោយយោធានៅតែបន្តប្រយុទ្ធប្រឆាំងនឹងក្រុមប្រដាប់អាវុធ។

អ្នកជំនាញដែលសិក្សាពីប្រវត្តិសាស្ត្រ និងព្រឹត្តិការណ៍បច្ចុប្បន្នរបស់មីយ៉ាន់ម៉ា បាននិយាយថា៖ ដើម្បីបញ្ចប់សង្គ្រាមនេះដោយផ្នែក និងដើម្បីមានឥទ្ធិពលនយោបាយលើក្រុមឧទ្ទាមជនជាតិភាគតិច ចំណុចដែលមានសារៈសំខាន់ខ្លាំងគឺការនាំមីយ៉ាន់ម៉ា ឱ្យវិលត្រឡប់ទៅរកស្ថានភាពធម្មតាវិញ។

អ្នកវិភាគបន្តថា «ការបោះឆ្នោតនេះគឺជាសញ្ញាមួយដែលបង្ហាញថា ការបន្តសង្គ្រាមស៊ីវិល ដូចដែលកើតមានក្នុងប៉ុន្មានឆ្នាំចុងក្រោយនេះ គឺពិបាកខ្លាំងណាស់ ហើយពិតជាហត់នឿយសម្រាប់យោធាមីយ៉ាន់ម៉ា ប៉ុន្តែការបោះឆ្នោតនេះនឹងមិននាំមកនូវអ្វីថ្មីទាល់តែសោះនៅមីយ៉ាន់ម៉ា»។

កន្លងមក អ្នកវិភាគ និងអ្នកការទូតបាននិយាយរួចមកហើយថា គោលបំណងនៃការបង្កើតរដ្ឋបាលស្ថិរភាពមួយក្នុងប្រទេសនេះ គឺជារឿងមិនអាចទៅរួចនោះទេ ដោយសារតែសង្គ្រាមស៊ីវិលកំពុងបន្តឆាបឆេះ ម្យ៉ាងវិញទៀត រដ្ឋាភិបាលគ្រប់គ្រងដោយយោធាដែលមានរូបរាងស៊ីវិល ទំនងជាមិនទទួលបានការគាំទ្រច្រើននៅក្រៅប្រទេសនោះឡើយ៕