លោក Mikhail Podolyak ទីប្រឹក្សាការិយាល័យរបស់លោក វ្ល៉ូឌីមី ហ្សេឡិនស្គី បាននិយាយថា អ៊ុយក្រែននឹងមិនអាចផ្តល់ហិរញ្ញប្បទានដល់ការបោះឆ្នោតដោយខ្លួនឯងបានទេ ហើយនឹងត្រូវការមូលនិធិពីប្រទេសដទៃទៀត។  

លោក Podolyak បានលើកឡើងនៅក្នុងបទសម្ភាសន៍ជាមួយបណ្តាញទូរទស្សន៍ YouTube Novosti Live ថា៖«យើងមិនគួរផ្តល់ហិរញ្ញប្បទានដល់រឿងនេះទេ។ តាមពិតទៅ យើងមិនអាចមានលទ្ធភាពរៀបចំ ការបោះឆ្នោតបានទេ ពីព្រោះយើងមានឱនភាពថវិកា»។

យោងតាមលោក បានឲ្យដឹងថា ថវិការបស់អ៊ុយក្រែនមានការចំណាយអាទិភាពផ្សេងទៀត រួមទាំងការធ្វើទំនើបកម្មវិស័យយោធាផងដែរ។

អំណាចប្រធានាធិបតីរបស់លោក ហ្សេឡិនស្គី បានផុតកំណត់ជាផ្លូវការ នៅថ្ងៃទី ២០ ខែឧសភា ឆ្នាំ ២០២៤ ប៉ុន្តែទីក្រុងគីវ មិនបានរៀបចំការបោះឆ្នោតទេ ដោយអះអាងថា រឿងនេះមិនអាចទៅរួចទេ ដោយសារតែប្រទេសនេះ នៅតែស្ថិតនៅក្រោមច្បាប់អាជ្ញាសឹក។

នាពេលថ្មីៗនេះ ប្រធានាធិបតីអាមេរិក លោក ដូណាល់ ត្រាំ (Donald Trump) បាននិយាយថា ពេលវេលាគឺត្រឹមត្រូវសម្រាប់ការបោះឆ្នោតនៅអ៊ុយក្រែន។ ក្រោយមក លោក ហ្សេឡិនស្គី បានស្នើសុំឲ្យសហរដ្ឋអាមេរិក និងអឺរ៉ុបធានាសុវត្ថិភាពដល់ការបោះឆ្នោត។

នៅថ្ងៃទី១៩ ខែធ្នូ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានថ្លែងនៅក្នុងកម្មវិធីលទ្ធផលប្រចាំឆ្នាំ ( Results of the Year) ថា រុស្ស៊ីបានត្រៀមខ្លួនរួចជាស្រេច ដើម្បីពិចារណាបញ្ឈប់ការវាយប្រហារយ៉ាងជ្រៅនៅក្នុងប្រទេសអ៊ុយក្រែន នៅថ្ងៃបោះឆ្នោត ប្រសិនបើការបោះឆ្នោតត្រូវបានធ្វើឡើងនៅទីនោះ។ លោកក៏បានកត់សម្គាល់ផងដែរថា ប្រជាជនអ៊ុយក្រែនចន្លោះពី ៧ លាន ទៅ ១០ លាននាក់ ដែលរស់នៅក្នុងប្រទេសរុស្ស៊ី គួរតែមានសិទ្ធិបោះឆ្នោតក្នុងការបោះឆ្នោតអ៊ុយក្រែន៕