ប្រធានាធិបតីលីបង់ លោក Joseph Aoun បាននិយាយកាលពីថ្ងៃព្រហស្បតិ៍ថា ហានិភ័យនៃការបន្ត   សង្គ្រាមជាមួយអ៊ីស្រាអែល បានថយចុះហើយ ដោយសារតែកិច្ចខិតខំប្រឹងប្រែងផ្នែកការទូតដែលកំពុងបន្ត និងយន្តការបន្ធូរបន្ថយភាពតានតឹង ទោះបីជាមានការវាយប្រហារជាបន្តបន្ទាប់របស់អ៊ីស្រាអែល នៅក្នុងតំបន់មួយចំនួននៃប្រទេសនេះក៏ដោយ។

លោក Aoun បានថ្លែងប្រាប់អ្នកសារព័ត៌មាន បន្ទាប់ពីដំណើរទស្សនកិច្ចនៅថ្ងៃបុណ្យណូអែល ទៅកាន់កន្លែងតាំងទីលំនៅ Bkerke នៅភាគកណ្តាលប្រទេសលីបង់ថា៖«ខ្ញុំអាចប្រាប់អ្នកបានថា ស្រមោលនៃសង្គ្រាមបានកន្លងផុតទៅហើយ» ដោយបន្ថែមថា ការចរចាបានជួយកាត់បន្ថយការព្រមានរបស់អ៊ីស្រាអែលអំពីការបន្តអរិភាពដែលអាចកើតមាន បន្ទាប់ពីឆ្នាំថ្មី។  

លោក Aoun បាននិយាយថា ស្ថានភាពសន្តិសុខនៅភាគខាងត្បូងប្រទេសលីបង់ នៅតែផុយស្រួយ ដោយប្រជាជននៅតែមិនអាចត្រឡប់ទៅផ្ទះសម្បែងរបស់ពួកគេវិញ អ្នកជាប់ឃុំនៅលីបង់ ត្រូវបានឃុំខ្លួននៅក្នុងពន្ធនាគារអ៊ីស្រាអែល និងការវាយប្រហារថ្មីៗរបស់អ៊ីស្រាអែល ត្រូវបានរាយការណ៍ នៅក្នុងតំបន់ភាគ   ខាងត្បូង និងជ្រលងភ្នំ Bekaa។

លោកបានបញ្ជាក់ថា ប្រទេសលីបង់បានរក្សាទំនាក់ទំនងជាមួយប្រទេសដែលមានឥទ្ធិពល រួមទាំងសហរដ្ឋអាមេរិក សហភាពអឺរ៉ុប និងរដ្ឋអារ៉ាប់ ដោយធ្វើការស្របគ្នាជាមួយគណៈកម្មាធិការយន្តការដែលមានភារកិច្ចទប់ស្កាត់ការកើនឡើងភាពតានតឹង និងធ្វើឲ្យស្ថានភាពមានស្ថិរភាពនៅតាមបណ្តោយព្រំដែន។

យោងតាមប្រធានាធិបតីលីបង់រូបនេះ បានឲ្យដឹងថា ខណៈពេលដែលការចរចាជារឿយៗពាក់ព័ន្ធនឹងការទាមទារកាន់តែខ្លាំងឡើង ការចូលរួមការទូត កំពុងឆ្ពោះទៅរក «ការសន្និដ្ឋានជាវិជ្ជមាន»។ លោកបានសង្កត់ធ្ងន់ថា ប្រទេសលីបង់នៅតែប្តេជ្ញាចិត្តក្នុងការការពារស្ថិរភាព និងទប់ស្កាត់ការវិលត្រឡប់ទៅរកសង្គ្រាម ខណៈពេលដែលបន្តកិច្ចខិតខំប្រឹងប្រែង ដើម្បីពង្រឹងស្ថាប័នរដ្ឋ និងធានាសន្តិសុខទូទាំង       ប្រទេសនេះ៕