កាលពីថ្ងៃព្រហស្បតិ៍ (ទី២៥ ខែធ្នូ) ប្រទេសរុស្ស៊ីបានថ្កោលទោសការប៉ុនប៉ងរបស់ប្រទេសជប៉ុន ដើម្បីលាងជម្រះប្រវត្តិសាស្រ្តរបស់ខ្លួន ជុំវិញការឈ្លានពានខាងយោធានិយម និងឧក្រិដ្ឋកម្មសង្គ្រាម ដោយជំរុញឲ្យទីក្រុងតូក្យូប្រឈមមុខជាមួយអតីតកាលរបស់ខ្លួន ហើយសុំអភ័យទោសដោយសុទ្ធចិត្ត ចំពោះជនរងគ្រោះ។

អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បានធ្វើការកត់សម្គាល់បែបនេះ នៅឯសន្និសីទសារព័ត៌មានមួយ ដើម្បីឆ្លើយតបទៅនឹងសំណួររបស់សារព័ត៌មាន Xinhua ទាក់ទងនឹងរបាយការណ៍ ដែលថា នាយករដ្ឋមន្ត្រីជប៉ុន លោកស្រី Sanae Takaichi អាចទៅកាន់ទីសក្ការៈ Yasukuni។

លោកស្រី Zakharova បានចង្អុលបង្ហាញថា ទីសក្ការៈ Yasukuni គឺជានិមិត្តរូបនៃលទ្ធិយោធានិយមរបស់ជប៉ុន ដែលជាកន្លែងផ្ដល់ការគោរពដល់ឧក្រិដ្ឋជនសង្គ្រាមជប៉ុនកម្រិត A ដែលត្រូវបានកាត់ទោសប្រហារជីវិតដោយតុលាការយោធាអន្តរជាតិ សម្រាប់តំបន់ចុងបូព៌ា។

លោកស្រីបានបន្តថា៖ «វាគឺជារឿងពិបាក សម្រាប់ពួកយើង ក្នុងការស្រមៃមើលថា តើមានជីវិតមនុស្សប៉ុន្មាននាក់ ដែលត្រូវបានផ្ដាច់ដោយយោធានិយមរបស់ជប៉ុន និងថា តើមានវិធីដ៏ឃោរឃៅអ្វីខ្លះដែលបានប្រព្រឹត្តលើជនស៊ីវិល ប៉ុន្តែទាំងនេះគឺជាការពិតដែលត្រូវបានកត់ត្រាទុកក្នុងប្រវត្តិសាស្ត្រ»។

លោកស្រីអ្នកនាំពាក្យរូបនេះបានសង្កត់ធ្ងន់ថា ប្រទេសរុស្ស៊ីជាថ្មីម្តងទៀត ជំរុញឲ្យប្រទេសជប៉ុនបោះបង់ចោលការប៉ុនប៉ងរបស់ខ្លួន ដើម្បីលាងជម្រះនិងលាក់បាំងនូវអំពើឃោរឃៅអមនុស្សធម៌ នៅក្នុងប្រវត្តិសាស្ត្ររបស់ខ្លួន និងទទួលស្គាល់យ៉ាងពេញលេញនូវផលប៉ះពាល់ពីសង្គ្រាមលោកលើកទី២៕