យោងតាមប្រព័ន្ធផ្សព្វផ្សាយក្នុងស្រុក បានឲ្យដឹងថា កសិករបារាំង កាលពីថ្ងៃព្រហស្បតិ៍ (ទី២៥ ខែធ្នូ) បានបន្តបិទផ្លូវ និងផ្លូវហាយវេ នៅភាគនិរតីនៃប្រទេសបារាំង ទោះបីជាថ្ងៃនោះ គឺជាបុណ្យណូអែលក៏ដោយ។

ដោយចាប់ផ្តើមការប្រមូលផ្ដុំរបស់ពួកគេ កាលពីជាង ១០ថ្ងៃមុន ជុំវិញគោលនយោបាយរបស់រដ្ឋាភិបាល ក្នុងការសម្លាប់សត្វគោ ដោយសាររកឃើញជំងឺស្បែក កសិករបានបិទផ្លូវ និងផ្លូវហាយវេ ជាច្រើនទូទាំងភាគខាងត្បូងទីក្រុង Bordeaux ចំណុចជាច្រើនរវាងទីក្រុង Toulouse និង Bayonne ក៏ដូចជា Pyrenees-Atlantiques ។

នៅក្នុងតំបន់ Pyrenees-Atlantiques កសិករកំពុងរៀបចំក្បួនត្រាក់ទ័រ នៅយប់ថ្ងៃនោះ។ នៅទីក្រុង Toulouse ភាគខាងត្បូង មនុស្សជាង ៣០០នាក់ បានចូលរួមក្នុងពិធីបុណ្យណូអែលដែលរៀបចំដោយក្រុមបាតុករ។

កសិករបារាំងបានតវ៉ានឹងគោលនយោបាយរបស់រដ្ឋាភិបាល ក្នុងការសម្លាប់ហ្វូងគោជាប្រព័ន្ធ ដោយសាររកឃើញជំងឺរលាកស្បែក ដែលគេស្គាល់ថា ជាជំងឺដុំពកស្បែក។

ជាមួយគ្នានេះ ពួកគេក៏បានសម្តែងការមិនសប្បាយចិត្តជាមួយនឹងកិច្ចព្រមព្រៀងពាណិជ្ជកម្ម រវាងសហភាពអឺរ៉ុប និងប្លុកអាមេរិកខាងត្បូង (Mercosur) ដែលមានប្រេស៊ីល អាហ្សង់ទីន ប៉ារ៉ាហ្គាយ និងអ៊ុយរូហ្គាយ។ នាយករដ្ឋមន្ត្រីបារាំង លោក Sebastien Lecornu បានស្នើឲ្យមានកិច្ចប្រជុំជាមួយសហជីពកសិករ នៅដើមខែមករាឆ្នាំក្រោយ៕