មន្ត្រី ២នាក់ បានប្រាប់ឲ្យដឹងថា ការស៊ើបអង្កេតរបស់កូរ៉េខាងត្បូង ជុំវិញការធ្លាក់យន្តហោះរបស់ក្រុមហ៊ុនអាកាសចរណ៍ Jeju Air ដែលបានឆក់យកជីវិតមនុស្ស ១៧៩នាក់ នឹងមិនអាចបំពេញតាមកាលកំណត់រយៈពេល ១ឆ្នាំ ក្នុងការចេញផ្សាយនូវរបាយការណ៍ដែលមានវឌ្ឍនភាព ខណៈដែលសាច់ញាតិជនរងគ្រោះដែលពោរពេញដោយការខកចិត្ត នៅតែបន្តទាមទារចម្លើយ អំពីអ្វីដែលជាកំហុសឆ្គង។

មន្ត្រីក្រុមប្រឹក្សាទាំង ២រូប បានឲ្យដឹងថា ក្រុមប្រឹក្សាស៊ើបអង្កេតគ្រោះថ្នាក់របស់ប្រទេស នឹងមិនចេញផ្សាយឡើយនូវបច្ចុប្បន្នភាពបណ្តោះអាសន្ន នៅថ្ងៃខួបលើកទី១ នាថ្ងៃទី២៩ ខែធ្នូ ជុំវិញឧបទ្ទវហេតុធ្លាក់យន្តហោះដ៏អាក្រក់បំផុត នៅលើដែនដីរបស់កូរ៉េខាងត្បូង។ ពួកគេបដិសេធមិនបង្ហាញអត្តសញ្ញាណ ដោយសារតែភាពរសើបនៃបញ្ហានេះ។

គួររំលឹកថា កាលពីថ្ងៃទី២៩ ខែធ្នូ ឆ្នាំ២០២៤ យន្តហោះ Boeing 737-800 បានធ្វើការចុះចតជាបន្ទាន់នៅអាកាសយានដ្ឋាន Muan បានរត់ជ្រុលហួសពីផ្លូវរត់ បន្ទាប់មកបានបុកយ៉ាងពេញទំហឹងជាមួយនឹងជញ្ជាំងបេតុង ហើយបានផ្ទុះឆេះ ដោយបានសម្លាប់មនុស្សទាំងអស់ លើកលែងតែ ២នាក់ ក្នុងចំណោម ១៨១នាក់ នៅលើយន្តហោះនោះ។

ក្រុមប្រឹក្សាស៊ើបអង្កេតគ្រោះថ្នាក់អាកាសចរណ៍ និងផ្លូវដែកដែលដឹកនាំដោយរដ្ឋាភិបាល បានឲ្យដឹងនៅក្នុងរបាយការណ៍បឋមមួយកាលពីខែមករាថា ម៉ាស៊ីនទាំង២ របស់យន្តហោះនោះ បានរងការវាយប្រហារដោយសត្វបក្សី។ ហើយក្រុមអ្នកស៊ើបអង្កេត បានលើកឡើងនៅក្នុងការធ្វើបច្ចុប្បន្នភាពខែកក្កដាថា អ្នកបើកយន្តហោះ បានពន្លត់ម៉ាស៊ីនដែលមិនជាខូចខាតធ្ងន់ធ្ងរ បន្ទាប់ពីមានការវាយប្រហាររបស់បក្សីនោះ តែរបាយការណ៍នេះមិនត្រូវបានចេញផ្សាយជាសាធារណៈនោះឡើយ ដោយសារតែមានការជំទាស់ពីក្រុមគ្រួសារជនរងគ្រោះ៕