ប្រព័ន្ធផ្សព្វផ្សាយរដ្ឋ នៅថ្ងៃសុក្រ (ទី២៦ ខែធ្នូ) នេះ បានរាយការណ៍ថា ប្រទេសអ៊ីរ៉ង់ បានរឹបអូសនាវាដឹកប្រេងបរទេស នៅជិតកោះ Qeshm របស់អ៊ីរ៉ង់ ក្នុងឈូងសមុទ្រ ដោយបញ្ជាក់ថា នាវានោះបានដឹកប្រេងរត់ពន្ធចំនួន ៤លានលីត្រ។

អាជ្ញាធរមិនបានបញ្ចេញឈ្មោះ ឬបង្ហាញសញ្ជាតិរបស់នាវានោះទេ។ ពួកគេបាននិយាយថា សមាជិកនាវិកបរទេសចំនួន ១៦នាក់ ត្រូវបានឃុំខ្លួន ជុំវិញបទចោទព្រហ្មទណ្ឌ។ ទូរទស្សន៍រដ្ឋ បានផ្សាយថា នាវាដឹកប្រេងនេះ ត្រូវបានរឹបអូសកាលពីថ្ងៃពុធ។

គេហទំព័រព័ត៌មានរបស់អ៊ីរ៉ង់ បានផ្សព្វផ្សាយវីដេអូ និងរូបថតនៃអ្វីដែលពួកគេលើកឡើងថា ជានាវាដឹកប្រេងដែលត្រូវបានរឹបអូស។ អ៊ីរ៉ង់បានប្រាប់កាលពីសប្តាហ៍មុនថា ខ្លួនបានរឹបអូសនាវាដឹកប្រេងបរទេសមួយគ្រឿងទៀតដែលផ្ទុកប្រេង ៦លានលីត្រ ជាអ្វីដែលខ្លួនបានពិពណ៌នាថា ជាប្រេងម៉ាស៊ូតរត់ពន្ធនៅឈូងសមុទ្រអូម៉ង់ តែមិនបង្ហាញអត្តសញ្ញាណ ឬសញ្ជាតិរបស់នាវានោះឡើយ។

ប្រទេសអ៊ីរ៉ង់ ដែលមានតម្លៃប្រេងឥន្ធនៈទាបបំផុតលើពិភពលោក ដោយសារតែការឧបត្ថម្ភធនយ៉ាងច្រើន និងការធ្លាក់ចុះយ៉ាងខ្លាំងនៃតម្លៃរូបិយប័ណ្ណជាតិរបស់ខ្លួន បាននិងកំពុងស្វែងរកការទប់ស្កាត់ការរត់ពន្ធប្រេងយ៉ាងទូលំទូលាយ តាមផ្លូវគោកទៅកាន់ប្រទេសជិតខាង និងតាមផ្លូវទឹក ទៅកាន់រដ្ឋឈូងសមុទ្រ៕