មន្ត្រីទីភ្នាក់ងារសង្គ្រោះបន្ទាន់ បានឲ្យដឹងនៅថ្ងៃសុក្រ (ទី២៦ ខែធ្នូ) នេះថា មនុស្សយ៉ាងហោចណាស់ ១៤នាក់ បានរងរបួសនៅក្នុងការវាយប្រហារដោយចាក់ នៅក្នុងរោងចក្រមួយកន្លែង នាភាគកណ្តាលប្រទេសជប៉ុន ជាហេតុការណ៍ដែលមានការបាញ់សារធាតុរាវមិនមានប្រភេទច្បាស់លាស់ផងដែរ។

មន្ត្រីនាយកដ្ឋានពន្លត់អគ្គិភ័យ នៅទីក្រុង Mishima ក្នុងតំបន់ Shizuoka លោក Tomoharu Sugiyama បានប្រាប់សារព័តមានថា៖ «មនុស្ស ១៤នាក់ ត្រូវបានដឹកចេញដោយទីភ្នាក់ងារសង្គ្រោះបន្ទាន់»។ លោកបានបញ្ជាក់ថា ការហៅទូរសព្ទ បានកើតមានឡើងនៅវេលាម៉ោងប្រហែល ៤:៣០នាទីល្ងាច ម៉ោងក្នុងស្រុក (ត្រូវនឹងម៉ោង ៧:៣០នាទីព្រឹក ម៉ោងសកល) ចេញពីរោងចក្រកៅស៊ូក្បែរនោះ ដោយប្រាប់ថា «មានមនុស្ស ៥ ឬ ៦នាក់ ត្រូវបានចាក់ដោយជនម្នាក់ ហើយថា «អ្វីមួយដូចការបាញ់វត្ថុរាវ» ក៏ត្រូវបានប្រើប្រាស់ផងដែរ។

ប្រព័ន្ធផ្សព្វផ្សាយជប៉ុន រួមទាំងទូរទស្សន៍សាធារណៈ NHK បានរាយការណ៍ថា នគរបាលបានចាប់ខ្លួនបុរសម្នាក់ ដោយសង្ស័យពីបទប៉ុនប៉ងមនុស្សឃាត។ កម្រិតធ្ងន់ធ្ងរនៃការរងរបួស មិនត្រូវបានគេដឹងឡើយ បើទោះបីប្រព័ន្ធផ្សព្វផ្សាយ NHK បានឲ្យដឹងថា ជនរងគ្រោះទាំងអស់នៅតែមានស្មារតីធម្មតាក៏ដោយ។

ចំណែកលោក Sugiyama បានបន្ថែមថា យ៉ាងហោចណាស់ជនរងគ្រោះ ៦នាក់ ក្នុងចំណោមជនរងគ្រោះទាំង ១៤នាក់ ត្រូវបានបញ្ជូនទៅមន្ទីរពេទ្យតាមរថយន្តសង្គ្រោះបន្ទាន់។ ស្ថានភាពរបួសពិតប្រាកដក៏មិនច្បាស់លាស់ផងដែរ៕