អតីតនាយករដ្ឋមន្ត្រីដ៏មានឥទ្ធិពលរបស់ប្រទេសម៉ាឡេស៊ី លោក Najib Razak ត្រូវបានកាត់ទោសឲ្យជាប់ពន្ធនាគារកាលពីថ្ងៃសុក្ររយៈពេល១៥ឆ្នាំបន្ថែមទៀត និងពិន័យជាប្រាក់ចំនួន២,៨ពាន់លានដុល្លារ ពីបទរំលោភអំណាច និងការលាងលុយ នៅក្នុងការជម្រះក្តីធំបំផុតនៃរឿងអាស្រូវមូលនិធិ 1MDB រាប់ពាន់លានដុល្លារ ជាការចេញសេចក្តីសម្រេចដែលអាចមានផលវិបាកផ្នែកនយោបាយដ៏ធំ។

ក្រុមអ្នកស៊ើបអង្កេតម៉ាឡេស៊ី និងសហរដ្ឋអាមេរិកនិយាយថា យ៉ាងហោចណាស់មូលនិធិ៤,៥ពាន់លានដុល្លារត្រូវបានលួចពីមូលនិធិ 1Malaysia Development Berhad (1MDB) ជាមូលនិធិរដ្ឋដែលលោក Najib បង្កើតរួមគ្នានៅក្នុងឆ្នាំ២០០៩ អំឡុងពេលដំបូងរយៈពេល៩ឆ្នាំនៃការកាន់តំណែងរបស់លោកនៅក្នុងប្រទេសអាស៊ីអាគ្នេយ៍មួយនេះ។

ប្រាក់ជាង១ពាន់លានដុល្លារតាមការចោទប្រកាន់ថាបានចូលទៅក្នុងគណនីជាប់ពាក់ព័ន្ធនឹងលោក Najib អាយុ៧២ឆ្នាំ ដែលត្រូវបានជាប់ពន្ធនាគារលើកដំបូងក្នុងឆ្នាំ២០២២ ក្នុងករណីមូលនិធិ 1MDB មួយផ្សេងទៀត ហើយបានទទូចជាយូរមកហើយថា លោកត្រូវបានគេទុកជាអ្នករងកំហុសសម្រាប់រឿងអាស្រូវហិរញ្ញវត្ថុដ៏ធំបំផុតរបស់ប្រទេសម៉ាឡេស៊ី។ ការចេញសេចក្តីសម្រេចនេះអាចជំរុញឱ្យមានភាពតានតឹងបន្ថែមទៀតនៅក្នុងសម្ព័ន្ធភាពគ្រប់គ្រងរបស់នាយករដ្ឋមន្ត្រី លោក Anwar Ibrahim រួមមានគណបក្សរួបរួមជាតិម៉ាឡាយូ United Malays National Organisation (UMNO) ដែលលោក Najib នៅតែមានឥទ្ធិពលខ្លាំងទោះបីជាចេញពីពន្ធនាគារក៏ដោយ។ លោក Najib ត្រូវបានរកឃើញថាមានទោសពីបទរំលោភអំណាចចំនួនបួនករណី និងបទចោទប្រកាន់២១ករណីពីបទលាងលុយ បន្ទាប់ពីការតតំាងតាមផ្លូវច្បាប់ដ៏វែងឆ្ងាយ រួមមានទាំងការប្តឹងឧទ្ធរណ៍ជាច្រើនលើកច្រើនសារ ។