ប្រព័ន្ធផ្សព្វផ្សាយរដ្ឋបានរាយការណ៍ថា យ៉ាងហោចណាស់មនុស្ស ៧នាក់បានបាត់បង់ជីវិត នៅថ្ងៃសៅរ៍ (ទី២៧ ខែធ្នូ) នេះ នៅពេលដែលរថយន្តក្រុងដឹកអ្នកដំណើរ ១៩នាក់ បានក្រឡាប់នៅលើផ្លូវភ្នំ ក្នុងខេត្ត Yen Bai នៅភាគខាងជើងនៃប្រទេសវៀតណាម។

យោងតាមទីភ្នាក់ងារសារព័ត៌មានវៀតណាម (VNA) បានឲ្យដឹងថា រថយន្តក្រុង ២៩កៅអីដែលដឹកក្រុមសប្បុរសធម៌នេះ កំពុងធ្វើដំណើរចុះចំណោតនៅពេលដែលវាក្រឡាប់ ហើយក៏ខូចខាតយ៉ាងធ្ងន់ធ្ងរ។

លោក Hoang Anh Tuan ប្រធានឃុំ Phinh Ho បានប្រាប់សារព័ត៌មាន VNA ថា ក្រុមជួយសង្គ្រោះបានទាញអ្នកនៅរស់រានមានជីវិតចំនួន ១០នាក់ចេញពីរថយន្តកំពិចនោះ ខណៈអ្នកផ្សេងទៀត នៅតែជាប់នៅខាងក្នុង គិតត្រឹមម៉ោង ១០:៣០ព្រឹក ម៉ោងក្នុងស្រុក ខណៈដែលឧបករណ៍ធុនធ្ងន់ ត្រូវបានយកទៅកាន់ទីនោះ ដើម្បីកាត់តួរថយន្ត។

លោក Tuan បាននិយាយថា គ្រោះថ្នាក់នេះ ទំនងជាបណ្តាលមកពីការដាច់ហ្វ្រាំង។ ការហៅទូរសព្ទទៅអាជ្ញាធរខេត្ត Yen Bai និងឃុំ Phinh Ho មិនមានការឆ្លើយតបទេ។

យោងតាមសារព័ត៌មាន VNA បានឲ្យដឹងថា នគរបាល អង្គភាពយោធា មន្ត្រីមូលដ្ឋាន និងអ្នកស្រុក ត្រូវបានដាក់ពង្រាយ សម្រាប់កិច្ចខិតខំប្រឹងប្រែងជួយសង្គ្រោះ ខណៈដែលអាជ្ញាធរបានប្រាប់ថា ការស៊ើបអង្កេតលើមូលហេតុនៃគ្រោះថ្នាក់កំពុងបន្តធ្វើ៕