អង្គភាពសេវាសន្តិសុខសហព័ន្ធ (FSB) បាននិយាយកាលពីថ្ងៃសុក្រ ទី ២៦ខែធ្នូថា តុលាការទីក្រុងមូស្គូ បានកាត់ទោសអតីតអ្នកការទូតរុស្ស៊ីម្នាក់ឱ្យជាប់ពន្ធនាគារ១២ឆ្នាំនៅក្នុងអាណានិគមពន្ធនាគារមានសន្តិសុខខ្ពស់បំផុត ពីបទលក់ព័ត៌មានសម្ងាត់ដល់ចារកម្មសហរដ្ឋអាមេរិក ខណៈកំពុងបំពេញបេសកកម្មនៅសហរដ្ឋអាមេរិក។

អង្គភាព FSB ដែលជាអ្នកបន្តតំណែងសំខាន់របស់អង្គភាព KGB សម័យសូវៀត បាននិយាយថាលោក Arseniy Konovalov កើតនៅឆ្នាំ១៩៨៧ ត្រូវបានរកឃើញថាមានទោសពីបទក្បត់ជាតិ។ អង្គភាព FSB បាននិយាយនៅក្នុងសេចក្តីថ្លែងការណ៍ថា «វាត្រូវបានបង្កើតឡើង ដោយថា លោក Konovalov ជាបុគ្គលិកក្រសួងការបរទេសរុស្ស៊ី ក្នុងអំឡុងពេលបំពេញបេសកកម្មនៅបរទេសរយៈពេលវែងនៅសហរដ្ឋអាមេរិក បានផ្ទេរព័ត៌មានសម្ងាត់ទៅឲ្យចារកម្មអាមេរិកដើម្បីទទួលបានប្រាក់»។

លោក Konovalov ត្រូវបានឃុំខ្លួនដោយអង្គភាព FSB ដែលដឹកនាំអង្គភាពប្រឆាំងចារកម្មរបស់រុស្ស៊ី ក្នុងខែមីនា ឆ្នាំ២០២៤។ ទីភ្នាក់ងារសារព័ត៌មាន TASS បានចេញផ្សាយវីដេអូអំពី លោក Konovalov ដែលមើលទៅហាក់ដូចជាភ្ញាក់ផ្អើលក្នុងការឃុំខ្លួន ខណៈពេលកំពុងធ្វើដំណើរក្នុងរថយន្ត ហើយត្រូវបានគេប្រាប់ថា លោកត្រូវបានសង្ស័យថាក្បត់ជាតិ។