បើតាមរដ្ឋអាជ្ញាបានប្រាប់សារព័ត៌មានថា នគរបាលបារាំង កាលពីថ្ងៃសុក្រ (ទី២៦ ខែធ្នូ) បានចាប់ខ្លួនបុរសម្នាក់ ដែលសង្ស័យថា បានចាក់ស្ត្រី ៣នាក់ ក្នុងរថភ្លើងក្រោមដី នៅទីក្រុងប៉ារីស ខណៈដែលពិធីបុណ្យចុងឆ្នាំរបស់រដ្ឋធានីនេះ បានប្រព្រឹត្តទៅយ៉ាងអធិកអធម។

អាជ្ញាធរ RATP ដែលទីភ្នាក់ងារដំណើរការសេវាកម្មដឹកជញ្ជូន បានប្រាប់ថា ជនរងគ្រោះទាំង ៣នាក់ត្រូវបានវាយប្រហារនៅទីតាំង ៣ផ្សេងគ្នា តាមបណ្តោយផ្លូវរថភ្លើងក្រោមដីខ្សែទី៣ ដែលរត់កាត់កណ្តាលទីក្រុងប៉ារីស។

RATP បានបញ្ជាក់ថា ការវាយប្រហារនេះ បានកើតឡើងនៅចន្លោះម៉ោង ៤:១៥នាទីល្ងាច ម៉ោងក្រុងស្រុក (ត្រូវនឹង ១៥:១៥នាទី ម៉ោងសកល) និងម៉ោង ៤:៤៥ល្ងាច ម៉ោងក្នុងស្រុក នៅស្ថានីយ Republique និង Arts et Metiers ដែលស្ថានីយទាំង២ នៅជាប់នឹងតំបន់ Marais និងស្ថានីយ Opera។ ទីភ្នាក់ងារនេះបានបន្ថែមថា៖ «ជនរងគ្រោះត្រូវបានយកចិត្តទុកព្យាបាលយ៉ាងឆាប់រហ័ស ដោយសេវាសង្គ្រោះបន្ទាន់»។

នគរបាលក្រុងប៉ារីស បានឲ្យដឹងថា ស្ត្រី ២នាក់ដែលត្រូវបានវាយប្រហារ ទទួលបានការព្យាបាលដោយសេវាសង្គ្រោះបន្ទាន់ ហើយត្រូវបានបញ្ជូនទៅមន្ទីរពេទ្យ ប៉ុន្តែពួកគេមិនស្ថិតក្នុងស្ថានភាពធ្ងន់ធ្ងរនោះទេ។ ស្ត្រីទី៣ បានទៅមន្ទីរពេទ្យ ដើម្បីស្វែងរកការព្យាបាល៕