ភ្លៀងធ្លាក់ខ្លាំងរយៈពេល ៣ថ្ងៃដែលបានបង្កជាទឹកជំនន់យ៉ាងគំហុកភ្លាមៗ និងបំណាក់ភក់ នៅទូទាំងរដ្ឋ California ភាគខាងត្បូង បានថមថយបណ្ដើរៗហើយ កាលពីថ្ងៃសុក្រ (ទី២៦ ខែធ្នូ) ខណៈដែលអ្នកស្រុក នៅឯរមណីយដ្ឋានភ្នំ Wrightwood ដែលរងគ្រោះខ្លាំង បានចាប់ផ្តើមកាយល្បប់ភក់ និងវាយតម្លៃការខូចខាត។

យោងតាមសេវាអាកាសធាតុជាតិ បានឲ្យដឹងថា ព្យុះកើតឡើងចំពេលវិស្សមកាលនេះ បានធ្វើឲ្យអាងដ៏ធំនៅទីក្រុង Los Angeles លិចក្នុងទឹកភ្លៀងកម្ពស់រហូតដល់ ៦អ៊ីញ (១៥,២៤សង់ទីម៉ែត្រ) ត្រឹមថ្ងៃទី២៦ ខែធ្នូ ដោយកម្រិត ១២អ៊ីង ឬច្រើនជាងនេះ ត្រូវបានវាស់នៅតាមភ្នំដែលមានកម្ពស់ទាប ភាគខាងកើតទីក្រុង។

ភ្លៀងធ្លាក់ខ្លាំង អមដោយខ្យល់បក់បោកខ្លាំង ដែលបានរំលំដើមឈើ និងខ្សែបណ្តាញអគ្គិសនីទូទាំងតំបន់ បណ្តាលឲ្យដាច់ចរន្តអគ្គិសនី។ ព្រិលធ្លាក់ខ្លាំង កើតមាននៅតំបន់ភ្នំខាងលើ។

សូម្បីតែមុនពេលព្យុះបានបោកបក់ទៅដល់ អាជ្ញាធរបានចេញការព្រមានអំពីការជម្លៀស ចំពោះសង្កាត់នានាដែលត្រូវបានចាត់ទុកថា ងាយរងគ្រោះដោយទឹកជំនន់គំហុកភ្លាមៗ និងលំហូរកម្ទេចកម្ទី ជាពិសេសនៅជិតភ្នំដែលរងការបំផ្លាញដោយចំហេះព្រៃ។

បើទោះបីជាភ្លៀងធ្លាក់ខ្លាំង បាននិងកំពុងស្រាកបណ្ដើរៗហើយ កាលពីថ្ងៃទី២៦ ខែធ្នូក៏ដោយ ក៏ការប្រកាសឲ្យប្រុងប្រយ័ត្នពីទឹកជំនន់ នៅតែមាន សម្រាប់តំបន់ភាគច្រើននៃរដ្ឋ California ភាគខាងត្បូង។

នៅទីក្រុងរមណីយដ្ឋានភ្នំ Wrightwood ដែលមានអ្នកស្រុកប្រហែល ៥.០០០នាក់ ដែលទទួលរងនូវឥទ្ធិពលនៃព្យុះនេះ នៅតំបន់ភ្នំ San Gabriel ភាគឦសាននៃទីក្រុង Los Angeles ក្រុមតាមដានសុវត្ថិភាពតំបន់ បានចាប់ផ្តើមការវាយតម្លៃដំបូង អំពីការខូចខាតទ្រព្យសម្បត្តិ៕