ប្រទេសចិន នៅថ្ងៃសៅរ៍ (ទី២៧ ខែធ្នូ) នេះ បានអនុម័តយល់ព្រមដល់ការកែប្រែលើផ្នែកដ៏សំខាន់នៃច្បាប់ដែលមានគោលបំណងពង្រឹងសមត្ថភាពរបស់ទីក្រុងប៉េកាំង ក្នុងសង្គ្រាមពាណិជ្ជកម្ម ទប់ស្កាត់ការនាំចេញក្រៅប្រទេស រាប់ចាប់ពីរ៉ែយុទ្ធសាស្ត្រ រហូតទៅតុក្កតាសិច ហើយនិងបើកចំហសេដ្ឋកិច្ចបន្ថែមទៀត ១៩សែនកោដិដុល្លា។

ទីភ្នាក់ងារព័ត៌មានរដ្ឋ Xinhua បានរាយការណ៍នៅថ្ងៃទី២៧ ខែធ្នូនេះថា ការកែប្រែចុងក្រោយបំផុត ចំពោះច្បាប់ពាណិជ្ជកម្មបរទេសដែលត្រូវបានអនុម័តដោយស្ថាប័ននីតិប្បញ្ញត្តិកំពូលរបស់ប្រទេសចិន នឹងចូលជាធរមាននៅថ្ងៃទី១ ខែមីនា ឆ្នាំ២០២៦។

មហាអំណាចសេដ្ឋកិច្ចទី២ របស់ពិភពលោកមួយនេះ កំពុងរុះរើក្របខ័ណ្ឌច្បាប់ ទាក់ទងនឹងពាណិជ្ជកម្មរបស់ខ្លួន ដោយផ្នែក ដើម្បីបញ្ចុះបញ្ចូលសមាជិកនៃប្លុកពាណិជ្ជកម្មដ៏ធំឆ្លងមហាសមុទ្រប៉ាស៊ីហ្វិក ដែលត្រូវបានបង្កើតឡើង ក្នុងគោលបំណងទប់ទល់នឹងឥទ្ធិពលកើនឡើងជាលំដាប់របស់ប្រទេសចិន ពោលគឺជាមហាអំណាចផលិតកម្ម ដែលសមនឹងទទួលបានការរួមបញ្ចូលក្នុងកិច្ចពិភាក្សាសំខាន់ៗ ខណៈដែលទីក្រុងប៉េកាំងព្យាយាមកាត់បន្ថយការពឹងផ្អែកលើសហរដ្ឋអាមេរិក។

ដោយត្រូវបានអនុម័តនៅឆ្នាំ១៩៩៤ និងត្រូវបានកែសម្រួល ៣ដង ចាប់តាំងពីប្រទេសចិន បានចូលរួមជាមួយអង្គការពាណិជ្ជកម្មពិភពលោក ក្នុងឆ្នាំ២០០១ ថ្មីៗនេះ នៅឆ្នាំ២០២២ ច្បាប់ពាណិជ្ជកម្មបរទេសផ្តល់អំណាចដល់អ្នកបង្កើតគោលនយោបាយ ដើម្បីតបតត្រឡប់ទៅដៃគូពាណិជ្ជកម្មដែលស្វែងរកការទប់ស្កាត់ការនាំចេញរបស់ខ្លួន និងដើម្បីអនុម័តយន្តការនានា ដូចជា «បញ្ជីអវិជ្ជមាន» ដើម្បីបើកវិស័យដែលត្រូវបានរឹតត្បិត ចំពោះក្រុមហ៊ុនបរទេស។

សារព័ត៌មាន Xinhua បានឲ្យដឹងថា ការកែប្រែនេះក៏បន្ថែមនូវលក្ខខណ្ឌផ្តល់ជូន ដែលពាណិជ្ជកម្មបរទេស គួរតែ «បម្រើជាការអភិវឌ្ឍសេដ្ឋកិច្ច និងសង្គមជាតិ» និងជួយកសាងចិនឲ្យទៅជា «ប្រទេសពាណិជ្ជកម្មដ៏រឹងមាំ»។ បើយោងតាមសេចក្ដីរាយការណ៍របស់សារព័ត៌មាននេះ បានឲ្យដឹងទៀតថា ការកែសម្រួលនេះ «ពង្រីក និងកែលម្អ» បន្ថែមនូវឧបករណ៍ផ្លូវច្បាប់ ដើម្បីទប់ទល់នឹងបញ្ហាប្រឈមខាងក្រៅ៕