រដ្ឋមន្ត្រីការបរទេសអេស្ប៉ាញ កាលពីថ្ងៃសុក្រ (ទី២៦ ខែធ្នូ) បានឲ្យដឹងថា ស្ថានការណ៍ នៅក្នុងប្រទេសស៊ូដង់ បានក្លាយទៅជា «ស្ថានភាពមិនអាចគ្រប់គ្រងបានទៀតទេ» ខណៈសង្គ្រាមរយៈពេល ២ឆ្នាំ បានធ្វើឲ្យមនុស្សរាប់លាននាក់ ភៀសចេញពីទីលំនៅ និងជាង ១៥០.០០០នាក់ បានបាត់បង់ជីវិត។

លោក Jose Manuel Albares បានរៀបរាប់នៅលើបណ្ដាញសង្គម X ថា ជម្លោះនេះត្រូវបានសម្គាល់ដោយ «ការរំលោភសិទ្ធិមនុស្សជាបន្តបន្ទាប់ និងធ្ងន់ធ្ងរ» ដោយលើកឡើងជាពិសេសពីការកាន់កាប់លើទីក្រុង El-Fasher កាលពីខែតុលាឆ្នាំមុន។

លោកបានសង្កត់ធ្ងន់ថា អេស្ប៉ាញកំពុងអំពាវនាវឲ្យមានបទឈប់បាញ់ជាបន្ទាន់ និងការការពារជនស៊ីវិល ដោយគូសបញ្ជាក់ថា ការគោរពច្បាប់មនុស្សធម៌អន្តរជាតិ គឺជា «ករណីកិច្ចចាំបាច់»។

លោក Albares បានបន្ថែមថា ទីក្រុង Madrid នឹងបន្តផ្តល់ជំនួយមនុស្សធម៌ដល់ប្រជាជនស៊ូដង់ តាមរយៈទីភ្នាក់ងារអេស្ប៉ាញ សម្រាប់កិច្ចសហប្រតិបត្តិការអភិវឌ្ឍន៍អន្តរជាតិ (AECID) ហើយនឹងគាំទ្ររាល់កិច្ចខិតខំប្រឹងប្រែងដែលកំពុងបន្តសំដៅសម្រេចបានសន្តិភាព។

គួរបញ្ជាក់ថា វិបត្តិនៅស៊ូដង់ មានសភាពកាន់តែអាក្រក់ទៅៗ ចាប់តាំងពីសង្រ្គាម រវាងកងទ័ពស៊ូដង់ និងក្រុម RSF (កងកម្លាំងគាំទ្ររហ័សយោធាប៉ារ៉ា) បានផ្ទុះឡើងក្នុងខែមេសា ឆ្នាំ២០២៣ ដោយបានផ្ដាច់ជីវិតមនុស្សរាប់ម៉ឺននាក់ និងប្រហែល ១៣លាននាក់ក្លាយជាជនភៀសឹក៕