ប្រធានាធិបតីរុស្ស៊ីលោក Vladimir Putin និយាយកាលពីថ្ងៃសៅរ៍ថា រុស្ស៊ីអាចកាត់យល់បានថា ទីក្រុងគីវមិនចង់ប្រញាប់ប្រញាល់បញ្ចប់ជម្លោះអ៊ុយក្រែនដោយមធ្យោបាយសន្តិវិធីនោះទេ ។

លោក Putin និយាយថា បើសិនជាអ៊ុយក្រែនពុំចង់ដោះស្រាយជម្លោះដោយសន្តិវិធីទេនោះ រុស្ស៊ីនឹងសម្រេចឲ្យបានគោលដៅទាំងអស់នៃប្រតិបត្តិការសឹកពិសេសរបស់ខ្លួន ដោយប្រើប្រាស់កម្លាំង ។

កាលពីព្រឹកថ្ងៃសៅរ៍ ជាការឆ្លើយតបចំពោះការវាយប្រហារយានដ្រូន និងមីស៊ីលរបស់រុស្ស៊ី ប្រធានាធិបតីអ៊ុយក្រែនលោក Volodymyr Zelenskiy និយាយថា រុស្ស៊ីបានបង្ហាញបំណងប្រាថ្នារបស់ខ្លួនចង់បន្តសង្រ្គាម ខណៈទីក្រុងគីវ ចង់បានសន្តិភាព ។

សេតវិមានពុំបានឆ្លើយតបភ្លាមៗនោះទេចំពោះសំណើសុំសេចក្តីអត្ថាធិប្បាយជុំវិញអនុសាសន៍របស់លោក Putin ។

លោក Putin ដែលបានអង្កេតប៉ុស្តិ៍បញ្ជាការមួយកន្លែងក្នុងចំណោមប៉ុស្តិ៍បញ្ជាការជាច្រើនកន្លែងទៀតរបស់កងកម្លាំងប្រដាប់អាវុធរុស្ស៊ី ទទួលបានរបាយការណ៍ពីនាយអគ្គសេនាធិការ Valery Gerasimov និងក្រុមមេបញ្ជាការកងកម្លាំងរុស្ស៊ីនៅភូមិភាគកណ្តាល និងភូមិភាគខាងកើត ។

ក្រុមមេបញ្ជាការរុស្ស៊ីទាំងនោះ និយាយប្រាប់លោក Putinថា កងកម្លាំងទីក្រុងមូស្គូ ដណ្តើមបានទីក្រុង Myrnohrad, Rodynske និងទីក្រុង Artemivka ស្ថិតក្នុងតំបន់ Donetsk របស់អ៊ុយក្រែន ក៏ដូចជាទីក្រុង Huliaipole និងទីក្រុង Stepnohirsk ស្ថិតក្នុងតំបន់ Zaporizhzhia ។

ទោះបីជាយ៉ាងណាក៏ដោយ យោធាអ៊ុយក្រែន និយាយនៅក្នុងការធ្វើបច្ចុប្បន្នភាពសមរភូមិមុខរបស់ខ្លួនកាលពីថ្ងៃសៅរ៍ថា កងកម្លាំងរបស់ពួកគេ បានរុញច្រានការប៉ុនប៉ងរបស់រុស្ស៊ី ក្នុងការរុលចូលទីក្រុង Myrnohrad និងទីក្រុង Huliaipole ៕