កំពង់ធំ៖ អាជ្ញាធរខេត្តកំពង់ធំ អំពាវនាវដល់ប្រជាពលរដ្ឋទាំងអស់ ជាពិសេសនៅតាមទីប្រជុំជនចូលរួមវេចខ្ចប់កាកសំណល់ដែលប្រើប្រាស់រួចឲ្យបានត្រឹមត្រូវ ដើម្បីរក្សាសុខភាពសាធារណៈ ឈានទៅរកជ័យលាភីពានរង្វាន់រំដួលបីទង នៃទិវាទីក្រុងស្អាតលើកទី១១ និងការប្រកាសយុទ្ធនាការ “កម្ពុជាស្អាត” ឆ្ពោះទៅស្វាគមន៍ព្រឹត្តិការណ៍កីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ខាងមុខ។

នៅថ្ងៃទី២ ខែមីនាម្សិលមិញ អាជ្ញាធរខេត្តកំពង់ធំ ប្រារព្ធ​កម្មវិធីទិវាជាតិទីក្រុងស្អាត ក្រោមប្រធានបទ “ទីក្រុងស្អាត” គាំទ្រការបើកទេសចរណ៍កម្ពុជា។

ជាមួយគ្នានេះ ឯកឧត្តម ងួន រតនៈ អភិបាលខេត្តកំពង់ធំ លើកឡើងថា ​គោលបំណងនៃទិវានេះ ជំរុញ និងលើកកម្ពស់កិច្ចសហការ ការពារ​បរិស្ថាន​សំដៅធ្វើឲ្យទីក្រុង និងទីប្រជុំជនកាន់តែមាន​សោភ័ណភាព​ស្រស់បំព្រង គឺ គ្មានសំរាម គ្មានប្លាស្ទិក នៅតាមដងផ្លូវ តាមទីផ្សារ ទីប្រជុំជន សួនច្បារសាធារណៈនានា ធានាបាននូវសុខមាលភាពរបស់ ប្រជាពលរដ្ឋឲ្យបានប្រសើរ។ ជាពិសេស ជំរុញដល់មន្ត្រីរាជការ កងកម្លាំងប្រដាប់អាវុធ ព្រះសង្ឃ អាជីវករ សិស្សានុសិស្ស កម្មករ កម្មការិនី និងប្រជាពលរដ្ឋឲ្យចូលរួម​សំអាត​បរិស្ថានទាំងអស់គ្នា។

ឯកឧត្តម បន្តថា ប្រជាពលរដ្ឋគ្រប់រូប ត្រូវចូលរួម ជាមួយអាជ្ញាធរ និងអ្នកពាក់ព័ន្ធផ្សេងទៀត ក្នុងការផ្តល់សេវា ទុកដាក់សំរាម ដែលប្រើប្រាស់រួចឲ្យបានត្រឹមត្រូវ ​និងបែងចែកសំរាម ទៅ​តាមលក្ខណៈ សំរាម សើម ស្ងួត រឹង រាវ ព្រមទាំងចាត់ទុកថា ​សកម្មភាពទុកដាក់កាកសំណល់ គឺជាកាតព្វកិច្ចទាំងអស់គ្នា​ ដែលត្រូវរួមគ្នាអនុវត្តន៍ប្រកបដោយទំនួលខុសត្រូវ។

ឯកឧត្តមបន្តថា ក្រុងស្ទឹងសែន ខេត្តកំពង់ធំ ​បានទទួលបានផ្ការំដួល ២ទង ហើយក៏ជាមោទនភាព​សម្រាប់ប្រជាពលរដ្ឋខេត្តកំពង់ធំ ផងដែរ។

កិច្ចការងារបន្ត យើងទាំងអស់គ្នា បាននិងកំពុង​ស្វាងរក​ចំណុច​ខ្វះខាត ធ្វើការ​អភិវឌ្ឍន៍​បន្ថែមទៀត ដើម្បីបំពេញបាន​លក្ខខ័ណ្ឌ​ផ្សេងៗ ​ដាក់ប្រកួតប្រជែងជាមួយ ខេត្ត ក្រុងផ្សេងទៀត ដើម្បី​ទទួល​បានរំដួលបីទង ​អមជាមួយការប្រកាសយុទ្ធនាការ “កម្ពុជាស្អាត” ឆ្ពោះទៅស្វាគមន៍​ព្រឹត្តិការណ៍​កីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ (SEA Games 2023) ខាងមុខ។

ឯកឧត្តម បញ្ជាក់ថា ជំហានខាងមុខ គឺ​ជាគោលដៅនៃការផ្លាស់ប្ដូរចំណង់ចំណូល​ចិត្តអ្នក​ទេសចរណ៍ ងាកទៅរកការដើរកម្សាន្តតាមតំបន់ជនបទ ​សហគមន៍ ​ទេសចរណ៍តំបន់ និង​តំបន់ធម្មជាតិនានា ​ការអភិវឌ្ឍវិស័យទេសចរណ៍ ស្របពេលដែលកម្ពុជា បង្កើនប្រសិទ្ធភាពនៃសកម្មភាពអភិវឌ្ឍន៍លើប្រព័ន្ធហេដ្ឋារចនាសម្ព័ន្ធ ទៅតាមទីជនបទ ជំរុញឲ្យមានការអភិវឌ្ឍជំនាញ និងការអប់រំ ផ្សព្វផ្សាយផលិតផលទេសចរណ៍ ស្របតាមបរិបទ នៃវិស័យទេសចរណ៍ ឌីជីថល និង និន្នាការ ទីផ្សារ ទេសចរណ៍៕