ប្រធានាធិបតីអ៊ុយក្រែន លោក Volodymyr Zelenskyy និងប្រធានាធិបតីអាមេរិក លោក Donald Trump នឹងបើកជំនួបដ៏សំខាន់មួយនៅរដ្ឋ Florida របស់សហរដ្ឋអាមេរិក នាថ្ងៃអាទិត្យ (២៨ ធ្នូ) នេះ ដើម្បីពិភាក្សាអំពីផែនការបញ្ចប់សង្គ្រាមនៅអ៊ុយក្រែន ស្របពេលការខ្វែងគំនិតគ្នានៅតែមានលើបញ្ហាសំខាន់ៗជាច្រើន និងការវាយប្រហារតាមអាកាសឥតឈប់ឈររបស់រុស្ស៊ី។

រុស្ស៊ីបានវាយប្រហារទីក្រុងគីវ និងតំបន់ផ្សេងទៀតទូទាំងប្រទេសអ៊ុយក្រែន ដោយប្រើមីស៊ីល និងយានដ្រូនរាប់រយគ្រឿងកាលពីថ្ងៃសៅរ៍កន្លងទៅ ដោយបានបំផ្លាញបណ្ដាញអគ្គិសនី និងកម្ដៅ ក្នុងតំបន់មួយចំនួននៃរដ្ឋធានី ស្របពេលរដូវរងាដ៏កំណាច។ លោក Zelenskyy បានហៅការវាយប្រហារនោះថា ជាការឆ្លើយតបរបស់រុស្ស៊ី ចំពោះកិច្ចប្រឹងប្រែងសន្តិភាព ដែលសម្របសម្រួលដោយសហរដ្ឋអាមេរិក។

ថ្លែងប្រាប់អ្នកសារព័ត៌មាន ប្រធានាធិបតីអ៊ុយក្រែនរូបនេះ បាននិយាយថា លោកមានគម្រោងពិភាក្សាពីជោគវាសនាតំបន់ Donbas ភាគខាងកើតអ៊ុយក្រែន ក្នុងអំឡុងកិច្ចប្រជុំនៅឯនិវេសនដ្ឋានរបស់លោក Trump ក្នុងរដ្ឋ Florida ក៏ដូចជាអនាគតនៃរោងចក្រថាមពលនុយក្លេអ៊ែរ Zaporizhzhia និងប្រធានបទផ្សេងៗទៀត ដែលជាបញ្ហាសំខាន់ក្នុងផែនការសន្តិភាព។ គួរឱ្យដឹងថា ទីក្រុងមូស្គូបានទទូចម្តងហើយម្តងទៀតថា អ៊ុយក្រែនត្រូវប្រគល់តំបន់ Donbas ទាំងអស់ ខណៈផ្នែកខ្លះៗនៃតំបន់នេះ ដែលនៅតែស្ថិតក្រោមការគ្រប់គ្រងរបស់ទីក្រុងគីវ។

ជំនួបទល់មុខគ្នារវាងលោក Zelenskyy ជាមួយលោក Trump ដែលគ្រោងធ្វើឡើងនៅម៉ោងក្នុងស្រុក ១ រសៀល (ពេលវេលានៅសហរដ្ឋអាមេរិក) បានកើតឡើងបន្ទាប់ពីកិច្ចប្រឹងប្រែងផ្នែកការទូតអស់ជាច្រើនសប្តាហ៍។ ទីក្រុងគីវ និងទីក្រុងវ៉ាស៊ីនតោន បានព្រមព្រៀងគ្នាលើបញ្ហាជាច្រើន ហើយលោក Zelenskyy ផ្ទាល់ក៏បាននិយាយថា ផែនការសន្តិភាព ២០ចំណុចនេះ ត្រូវបានបញ្ចប់ ៩០% ទៅហើយ ប៉ុន្តែបញ្ហានៃទឹកដី នៅមិនទាន់ដោះស្រាយបាននៅឡើយទេ៕