ប្រព័ន្ធផ្សព្វផ្សាយបានរាយការណ៍កាលពីថ្ងៃសៅរ៍ (២៧ ធ្នូ) ថា ជនភៀសខ្លួនប៉ាឡេស្ទីន រាប់ម៉ឺននាក់ ដែលរស់នៅដោយពុំមានផ្ទះសម្បែងក្នុងតំបន់ហ្កាហ្សាស្រ្ទីប កំពុងរងទុក្ខវេទនា ដោយសារព្យុះភ្លៀងរដូវរងាបន្តជន់លិចតង់ និងជម្រកបណ្ដោះអាសន្នរបស់ពួកគេ បន្ទាប់ពីការទម្លាក់គ្រាប់បែករបស់អ៊ីស្រាអែល រយៈពេល ២ឆ្នាំ ដែលបានបំផ្លាញផ្នែកភាគច្រើននៃតំបន់ហ៊ុមព័ទ្ធនេះរួចទៅហើយ។

អ្នកឧតុនិយម បាននិយាយថា ប្រព័ន្ធសម្ពាធទាបនៅតំបន់ប៉ូល អមដោយភ្លៀងធ្លាក់ខ្លាំង និងខ្យល់បក់ខ្លាំង បានបោកបក់ឆ្លងកាត់តំបន់ហ្កាហ្សា កាលពីថ្ងៃសៅរ៍ ហើយនេះជាប្រព័ន្ធសម្ពាធទាបលើកទី៣ហើយ ដែលប៉ះពាល់ដល់ដែនដីប៉ាឡេស្ទីនមួយនេះ ស្របពេលរដូវរងាដ៏កំណាច ខណៈប្រព័ន្ធសម្ពាធទាបលើកទី៤ ត្រូវបានព្យាករថា នឹងវាយប្រហារតំបន់នេះចាប់ពីថ្ងៃចន្ទ សប្ដាហ៍ក្រោយតទៅ។

ក្រុមគ្រួសារជាច្រើនរស់នៅក្នុងតង់ចាប់តាំងពីចុងឆ្នាំ២០២៣ មក ដោយសារសង្គ្រាមរបស់អ៊ីស្រាអែល លើតំបន់ហ្កាហ្សា ហើយមកទល់ពេលនេះ ពុំមានផ្ទះសម្បែងពិតប្រាកដនៅឡើយទេ។ តំបន់ដ៏តូចចង្អៀតមួយនេះក៏កំពុងប្រឈមនឹងសីតុណ្ហភាពត្រជាក់ខ្លាំង ភ្លៀង និងខ្យល់បក់ខ្លាំង ដោយអាជ្ញាធរព្រមានថា ភ្លៀងធ្លាក់ឥតឈប់ឈរអាចនឹងកើនកម្លាំងក្លាយទៅជាព្យុះពេញទំហឹង។

កាលពីដើមខែធ្នូ ភ្លៀងធ្លាក់ខ្លាំងបានជន់លិចតង់ និងជម្រកបណ្ដោះអាសន្ននៅទូទាំងតំបន់ហ្កាហ្សារួចទៅហើយ ដោយអាជ្ញាធរនៅតំបន់ហ្កាហ្សា បានរាយការណ៍ថា មនុស្សយ៉ាងតិច ១៥នាក់ រួមទាំងទារក ៣នាក់ បានស្លាប់ក្នុងគ្រោះថ្នាក់ពាក់ព័ន្ធនឹងអាកាសធាតុរដូវរងាដ៏អាក្រក់នេះ៕