អគ្គលេខាធិការអង្គការសហប្រជាជាតិ លោក Antonio Guterres បានអំពាវនាវឱ្យមានបទឈប់បាញ់ជាបន្ទាន់ នៅក្នុងសង្គ្រាមស៊ីវិលដ៏ឃោរឃៅរបស់ប្រទេសស៊ូដង់ ជាជម្លោះដ៏បង្ហូរឈាមដែលអង្គការសហប្រជាជាតិនិយាយថា បានបង្កើតវិបត្តិមនុស្សធម៌ដ៏អាក្រក់បំផុតរបស់ពិភពលោក ស្របពេលជនស៊ីវិលកំពុងតែជួប «ទុក្ខវេទនាដែលមិនអាចនឹកស្មានដល់»។

ការអំពាវនាវរបស់ប្រមុខ UN នេះ បានកើតឡើងបន្ទាប់ពីគំនិតផ្តួចផ្តើមសន្តិភាពមួយ របស់នាយករដ្ឋមន្ត្រីស៊ូដង់ លោក Kamil Idris ដាក់ជូនទៅកាន់ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃចន្ទកន្លងទៅ ដែលបានអំពាវនាវឱ្យកងកម្លាំងគាំទ្ររហ័សយោធាប៉ារ៉ា (RSF) ដកហូតអាវុធ ប៉ុន្តែត្រូវបាន RSF បដិសេធ ដោយចាត់ទុកថាជា «ការស្រមើស្រមៃ»។

សង្គ្រាមស៊ូដង់ បានផ្ទុះឡើងក្នុងខែមេសា ឆ្នាំ២០២៣ នៅពេលការតស៊ូដណ្តើមអំណាចផ្ទុះឡើងរវាងកងទ័ពស៊ូដង់ និងយោធាប៉ារ៉ា RSF។ តាំងពីពេលនោះមក ជម្លោះបានធ្វើឱ្យមនុស្ស ៩,៦ លាននាក់ ជម្លៀសខ្លួនក្នុងស្រុក និងបង្ខំឱ្យមនុស្ស ៤,៣ លាននាក់ភៀសខ្លួនទៅប្រទេសជិតខាង ខណៈពលរដ្ឋចំនួន ៣០,៤ លាននាក់ឥឡូវនេះ ត្រូវការជំនួយមនុស្សធម៌ នេះបើយោងតាមតួលេខរបស់ UN ។

ជំនួយការអគ្គលេខាធិការអង្គការសហប្រជាជាតិ បានប្រាប់ក្រុមប្រឹក្សាសន្តិសុខ UNSC ក្នុងសប្តាហ៍នេះថា ការប្រយុទ្ធកាន់តែបង្ហូរឈាមនៅស៊ូដង់ កំពុងខិតជិតមកដល់ ហើយ «អំពើហិង្សា និងការបំផ្លិចបំផ្លាញដ៏គួរឱ្យភ្ញាក់ផ្អើល កើតឡើងរៀងរាល់ថ្ងៃ ដោយជនស៊ីវិលកំពុងស៊ូទ្រាំនឹងទុក្ខវេទនាដ៏ធំធេង និងមិនអាចនឹកស្មានដល់ ដែលគ្មានទីបញ្ចប់»៕