អ្នកស្រាវជ្រាវអាមេរិកពីររូប ដែលសិក្សារូបភាពផ្កាយរណប បានរកឃើញថា ទីក្រុងមូស្គូទំនងជាកំពុងដាក់ពង្រាយមីស៊ីលបាលីស្ទិកល្បឿនលឿនជាងសំឡេងថ្មីដែលមានសមត្ថភាពនុយក្លេអ៊ែររបស់ខ្លួន នៅអតីតមូលដ្ឋានទ័ពអាកាសមួយនៅភាគខាងកើតប្រទេសបេឡារុស ដែលអាចជំរុញសមត្ថភាពរបស់រុស្ស៊ី ក្នុងការបញ្ជូនមីស៊ីលទៅទូទាំងទ្វីបអឺរ៉ុប។

ប្រភពមួយដែលដឹងបញ្ហានេះបានប្រាប់សារព័ត៌មានរ៉យទ័រថា ការវាយតម្លៃរបស់អ្នកស្រាវជ្រាវ បានស្របទៅនឹងការរកឃើញជាទូទៅរបស់ចារកម្មអាមេរិក។ ប្រធានាធិបតីរុស្ស៊ី លោក Vladimir Putin ធ្លាប់បញ្ជាក់យ៉ាងច្បាស់ពីចេតនារបស់លោក ក្នុងការដាក់មីស៊ីល Oreshnik រយៈចម្ងាយមធ្យម ដែលមានចម្ងាយប៉ាន់ស្មានរហូតដល់ ៥៥០០គីឡូម៉ែត្រ នៅក្នុងបេឡារុស ប៉ុន្តែទីតាំងពិតប្រាកដមិនត្រូវបានគេរាយការណ៍ពីមុនមកនោះទេ។

អ្នកស្រាវជ្រាវបាននិយាយថា ពួកគេប្រាកដ ៩០% ថា ជើងទម្រចល័តសម្រាប់បាញ់មីស៊ីល Oreshnik នឹងត្រូវដាក់ពង្រាយនៅអតីតមូលដ្ឋានទ័ពអាកាសក្បែរក្រុង Krichev ចម្ងាយប្រហែល ៣០៧គីឡូម៉ែត្រ ភាគខាងកើតរដ្ឋធានីបេឡារុស និងចម្ងាយ ៤៧៨គីឡូម៉ែត្រ ភាគនិរតីនៃទីក្រុងមូស្គូ។

អ្នកជំនាញមួយចំនួននិយាយថា ការដាក់ពង្រាយមីស៊ីល Oreshnik នេះ អាចគូសបញ្ជាក់ពីការពឹងផ្អែកកាន់តែខ្លាំងរបស់វិមានក្រឹមឡាំង លើការគំរាមកំហែងអាវុធនុយក្លេអ៊ែរ ខណៈខ្លួនកំពុងចង់រារាំងសមាជិកណាតូ មិនឱ្យផ្គត់ផ្គង់អាវុធដល់អ៊ុយក្រែន ដែលអាចវាយប្រហារចូលជ្រៅក្នុងទឹកដីរុស្ស៊ី។

ពុំមានការបញ្ជាក់ជាផ្លូវការលើរឿងនេះនៅឡើយទេ។ យ៉ាងណាមិញ ទីភ្នាក់ងារសារព័ត៌មានបេឡារុស Belta ដែលគ្រប់គ្រងដោយរដ្ឋ បានដកស្រង់សម្តីរដ្ឋមន្ត្រីក្រសួងការពារជាតិ លោក Viktor Khrenin កាលពីថ្ងៃពុធកន្លងទៅថា ការដាក់ពង្រាយមីស៊ីល Oreshnik នឹងមិនផ្លាស់ប្តូរតុល្យភាពអំណាចនៅអឺរ៉ុបទេ ហើយនេះគឺជា «ការឆ្លើយតប» ចំពោះ «សកម្មភាពឈ្លានពាន» របស់លោកខាងលិច៕