អគ្គលេខាធិការអង្គការណាតូ លោក Mark Rutte បានបញ្ជាក់ជាថ្មីពីការប្តេជ្ញាចិត្តរបស់ទីក្រុងវ៉ាស៊ីនតោនថា សហរដ្ឋអាមេរិក «គាំទ្រយ៉ាងពេញទំហឹង» ចំពោះសម្ព័ន្ធយោធានេះ ដោយបដិសេធការអំពាវនាវឱ្យអឺរ៉ុប ស្វែងរកឯករាជ្យភាពយោធាពីទីក្រុងវ៉ាស៊ីនតោន ខណៈការភ័យខ្លាចកាន់តែខ្លាំងឡើងអំពីការដកថយរបស់សហរដ្ឋអាមេរិក ពីតំបន់អឺរ៉ុប ដែលប្រឈមនឹងវិបត្តិសន្តិសុខដ៏ធ្ងន់ធ្ងរបំផុត ចាប់តាំងពីសង្គ្រាមត្រជាក់មក។

ថ្លែងប្រាប់សារព័ត៌មានអាល្លឺម៉ង់កាលពីថ្ងៃសុក្រកន្លងទៅ លោក Rutte បានលើកឡើងថា “លោកជឿជាក់យ៉ាងមុតមាំថា សហរដ្ឋអាមេរិក គាំទ្រយ៉ាងពេញទំហឹងចំពោះអង្គការណាតូ ដោយគ្មានការសង្ស័យនោះឡើយ”។

ការលើកឡើងរបស់ប្រមុខណាតូនេះ គឺជាការបដិសេធច្បាស់ៗចំពោះសំណួររបស់ប្រធានក្រុមនយោបាយធំបំផុតមួយក្នុងសភាអឺរ៉ុប ដែលចោទសួរថា តើអឺរ៉ុបនៅតែអាចពឹងផ្អែកលើទីក្រុងវ៉ាស៊ីនតោន សម្រាប់សន្តិសុខខ្លួនបានដែរឬទេ ស្របពេលមានការផ្លាស់ប្តូរនយោបាយអាមេរិក។

លោក Rutte បាននិយាយថា អឺរ៉ុបត្រូវតែទទួលខុសត្រូវកាន់តែខ្លាំងចំពោះសន្តិសុខរបស់ខ្លួន រួមទាំងការចំណាយលើការការពារជាតិយោធាកាន់តែខ្ពស់ ប៉ុន្តែការងារនេះ គួរតែត្រូវបានធ្វើឡើងក្នុងភាពជាដៃគូយ៉ាងជិតស្និទ្ធជាមួយសហរដ្ឋអាមេរិក នៅក្នុងក្របខណ្ឌអន្តរអាត្លង់ទិក។ ទាក់ទងនឹងការផ្លាស់ប្តូរគោលនយោបាយរបស់សហរដ្ឋអាមេរិក លោក Rutte បានសង្កត់ធ្ងន់ថា ទីក្រុងវ៉ាស៊ីនតោន នៅតែប្តេជ្ញាចិត្តយ៉ាងពេញទំហឹងចំពោះអង្គការណាតូ ហើយនឹងបន្តការចូលរួមផ្នែកយោធារបស់ខ្លួននៅអឺរ៉ុប៕