ប្រជាជនអ៊ីស្រាអែល រាប់ពាន់នាក់ បាននាំគ្នាចេញតវ៉ានៅទូទាំងប្រទេសក្រោមភ្លៀងធ្លាក់កាលពីថ្ងៃសៅរ៍ (២៧ ធ្នូ) ប្រឆាំងនឹងរដ្ឋាភិបាលរបស់លោកនាយករដ្ឋមន្ត្រី Benjamin Netanyahu ដោយអតីតមន្រ្តីជាន់ខ្ពស់ជាច្រើនបានរិះគន់គណៈរដ្ឋមន្ត្រីចំពោះការប្រព្រឹត្តរបស់ខ្លួនក្នុងជម្លោះតំបន់ហ្កាហ្សា ស្របពេលរឿងអាស្រូវនយោបាយដ៏ល្បីល្បាញទាក់ទងនឹងប្រទេសកាតា ឬគេស្គាល់ថារឿងអាស្រូវ "Qatargate"។

ការផ្តោតអារម្មណ៍របស់បាតុករអ៊ីស្រាអែល ក្នុងការតវ៉ាប្រឆាំងរដ្ឋាភិបាលនៅសប្តាហ៍នេះ លើប្រទេសកាតា ដែលជាអ្នកគាំទ្រដ៏សំខាន់របស់ក្រុមហាម៉ាស បានកើតឡើងបន្ទាប់ពីរបាយការណ៍ និងបទសម្ភាសន៍ ដែលបង្ហាញថា លោក Netanyahu ហាក់ដូចជាមានជាប់ពាក់ព័ន្ធនឹងទៅកាន់ការស៊ើបអង្កេត Qatargate ដែលក្នុងនោះ ជំនួយការកំពូលរបស់លោកគឺជាជនសង្ស័យសំខាន់ៗ ឬបានប្រឈមនឹងការចោទប្រកាន់។

អតីតនាយករដ្ឋមន្ត្រីអ៊ីស្រាអែល Naftali Bennett បានហៅរឿងអាស្រូវនេះថាជា «ទង្វើក្បត់ជាតិដ៏ធ្ងន់ធ្ងរបំផុតនៅក្នុងប្រវត្តិសាស្ត្រអ៊ីស្រាអែល»។

ការប្រមូលផ្ដុំប្រឆាំងរដ្ឋាភិបាល ក៏ត្រូវបានគាំទ្រដោយសកម្មជនជាច្រើនក្រុម ដែលកំពុងតវ៉ាប្រឆាំងនឹងការប៉ុនប៉ងរបស់រដ្ឋាភិបាលលោក Netanyahu ក្នុងការធ្វើឱ្យប្រព័ន្ធតុលាការចុះខ្សោយផងដែរ រួមទាំងការបដិសេធមិនបង្កើតគណៈកម្មការស៊ើបអង្កេតឯករាជ្យ ជុំវិញការវាយប្រហាររបស់ក្រុមហាម៉ាស នៅថ្ងៃទី ៧ ខែតុលា ឆ្នាំ២០២៣៕