សៀមរាប៖ អាជ្ញាធរជាតិអប្សរា កាលពីថ្ងៃម្សិលមិញ បានបើកវគ្គបណ្តុះបណ្តាលជំនាញស្តីពី «បទដ្ឋានក្នុងការរៀបចំដីធ្លី និងការគ្រប់គ្រងសំណង់ក្នុងរមណីយដ្ឋានអង្គរ» ជូនដល់មន្ត្រី-បុគ្គលិក នាមជ្ឍមណ្ឌលអាជ្ញាធរជាតិអប្សរា ស្ថិតនៅស្រុកប្រាសាទបាគង ខេត្ដសៀមរាប ដើម្បីពង្រឹងសមត្ថភាព និងផ្តល់ចំណេះដឹងបន្ថែមដល់មន្ត្រីបុគ្គលិកនៅស្ថាប័ននោះ។

លោក ស៊ឹម ប៊ុនធឿន និងជាអនុប្រធាននាយកដ្ឋានរៀបចំដែនដី ​និងគ្រប់គ្រងលំនៅដ្ឋានក្នុង​ឧទ្យានអង្គរ ​មានប្រសាសន៍ថា​ វគ្គបណ្តុះបណ្តាលនេះ​ មានគោលបំណងពង្រឹងសមត្ថភាព និងផ្តល់​ចំណេះដឹង​បន្ថែមដល់មន្ត្រី ​បុគ្គលិកនៃអាជ្ញាធរជាតិអប្សរា ​និងនិស្សិត លើការងារ​ពិនិត្យវាយតម្លៃ​អំពីសំណង់ និងការស្វែងយល់​ស៊ីជម្រៅពីបទដ្ឋាន​ច្បាប់​នៃការគ្រប់គ្រង​សំណង់ក្នុងតំបន់​រមណីយ​ដ្ឋានអង្គរ​ ព្រមទាំង​នីតិវិធី​ក្នុងការ​ចុះសម្របសម្រួលការងារប្រកបដោយ​ប្រសិទ្ធិភាព ស្របតាម​ទិសដៅ​របស់អាជ្ញាធរជាតិអប្សរា ​ជាពិសេស​ដើម្បីអប់រំ និងផ្សព្វផ្សាយចំណេះដឹង​ដល់និស្សិត​លើ​កិច្ចការរបស់អាជ្ញាធរជាតិអប្សរា ​និងការគ្រប់គ្រង​រមណីយដ្ឋាន​អង្គរបេតិកភណ្ឌពិភពលោក។

លោកថា ​មន្ដ្រី និងបុគ្គលិកនេះ​ ពួកគាត់មកពីនាយកដ្ឋានសណ្តាប់ធ្នាប់​ និងសហប្រតិបត្តិការ នាយកដ្ឋាន​រៀបចំដែនដី ​និងគ្រប់គ្រងលំនៅដ្ឋានក្នុងឧទ្យានអង្គរ រួមទាំងនិស្សិត​មហាវិទ្យាស្ថាបត្យកម្ម​នៃសាកលវិទ្យា-ល័យភូមិន្ទ ​និងវិចិត្រសិល្បៈ ​សរុបចំនួន ១០០នាក់។

លោក ស៊ឹម ប៊ុនធឿន ​បន្ថែមទៀតថា ​ក្នុងសិក្ខាសាលាបានធ្វើបទបង្ហាញ ​៤ចំណុចសំខាន់​ៗ ​ដល់​សិក្ខាកាម រួមមាន៖ ១.ច្បាប់​គតិយុត្តិ ការគ្រប់គ្រង ​និងប្រើប្រាស់ដី ​ការ​បដិសេធច្បាប់សាងសង់ ការ​អនុញ្ញាត​ច្បាប់សាងសង់, ២.សំណង់​លំនៅដ្ឋានខ្មែរ​ លក្ខណៈទូទៅនៃផ្ទះខ្មែរ ប្រភេទ​សំណង់នៃផ្ទះខ្មែរ លក្ខណៈបច្ចេកទេស​ នៃការសាងសង់ផ្ទះខ្មែរ ​និងការ​តុបតែង​កែលម្អ, ៣.ការផ្លាស់ប្ដូរ​សំណង់ផ្ទះខ្មែរ និងទី៤. គោលការណ៍​របស់អាជ្ញាធរ​ជាតិអប្សរាក្នុង​ការគ្រប់គ្រង​លំនៅដ្ឋាន​ប្រពៃណីក្នុងឧទ្យានអង្គរ។

ក្រោយពីបាន​បញ្ចប់វគ្គបណ្តុះបណ្តាលនេះ ​សិក្ខាកាមទាំងអស់ទទួល​បាននូវចំណេះដឹងនេះ ទៅ​អនុវត្តឱ្យមាន​ប្រសិទ្ធិភាព ​ដើម្បីធ្វើឱ្យប្រសើរឡើង​នូវបទដ្ឋាន​ក្នុង​ការរៀបចំដីធ្លី និង​ការគ្រប់គ្រង​សំណង់ក្នុងរមណីយដ្ឋាន​អង្គរ៕ អត្ថបទ៖ ឈិត សាវី