យោងតាមប្រព័ន្ធផ្សព្វផ្សាយរដ្ឋបានឲ្យដឹងថា មេដឹកនាំប្រទេសកូរ៉េខាងជើង លោកគីម ជុងអ៊ុន បានពិនិត្យមើលការបាញ់សាកល្បងមីស៊ីលស៊ីបគោលដៅយុទ្ធសាស្ត្ររយៈចម្ងាយឆ្ងាយ និងបានអំពាវនាវឱ្យមានការអភិវឌ្ឍ«គ្មានដែនកំណត់ និងប្រកបដោយចីរភាព»នៃកងកម្លាំងប្រយុទ្ធនុយក្លេអ៊ែររបស់ប្រទេសលោក។

ទីភ្នាក់ងារសារព័ត៌មានកណ្តាលកូរ៉េ (KCNA) បានរាយការណ៍នៅថ្ងៃចន្ទនេះថា លោកគីម បានបង្ហាញការពេញចិត្ត ខណៈមីស៊ីលស៊ីបគោលដៅបានហោះតាមបណ្តោយគន្លងរបស់វា ដែលកំណត់ឲ្យស្ថិតនៅខាងលើសមុទ្រភាគខាងលិចនៃឧបទ្វីបកូរ៉េ និងបានទៅដល់ចំគោលដៅរបស់វា។

ការបាញ់សាកល្បង ដែលបានធ្វើឡើងកាលពីថ្ងៃអាទិត្យ គឺជាព្រឹត្តិការណ៍ចុងក្រោយបំផុតដែលលោកគីមបានចូលរួម ជាសកម្មភាពរបស់មេដឹកនាំកូរ៉េខាងជើងដើម្បីបញ្ជាក់ពីវឌ្ឍនភាពផ្នែកយោធា និងសេដ្ឋកិច្ចរបស់ប្រទេស មុនពេលសមាជបក្សដ៏សំខាន់ដែលត្រូវបានគេរំពឹងថានឹងធ្វើឡើងនៅដើមឆ្នាំ២០២៦។ កិច្ចប្រជុំនេះ នឹងកំណត់ផែនការអភិវឌ្ឍន៍របស់កូរ៉េខាងជើងសម្រាប់រយៈពេលប្រាំឆ្នាំខាងមុខ។

លោកគីម បាននិយាយថា «ការត្រួតពិនិត្យពីភាពជឿជាក់ និងការឆ្លើយតបយ៉ាងឆាប់រហ័សនៃសមាសភាពទប់ស្កាត់នុយក្លេអ៊ែររបស់កូរ៉េខាងជើងលើមូលដ្ឋានជាប្រចាំ គ្រាន់តែជាការអនុវត្តទំនួលខុសត្រូវ» ខណៈប្រទេស «កំពុងប្រឈមនឹងការគំរាមកំហែងផ្នែកសន្តិសុខផ្សេងៗ»។ លោកក៏បានបញ្ជាក់ផងដែរថា ទីក្រុងព្យុងយ៉ាងនឹងបន្តលះបង់ «កិច្ចខិតខំប្រឹងប្រែងទាំងអស់របស់ខ្លួនចំពោះការអភិវឌ្ឍគ្មានដែនកំណត់ និងប្រកបដោយចីរភាពនៃកងកម្លាំងប្រយុទ្ធនុយក្លេអ៊ែររបស់រដ្ឋ» នេះបើយោងតាមការចុះផ្សាយរបស់សារព័ត៌មាន KCNA។