លោកប្រធានាធិបតីអាមេរិក Donald Trump បាននិយាយថា ការទូតលើសង្គ្រាមរុស្ស៊ី-អ៊ុយក្រែនកំពុងស្ថិតក្នុង «ដំណាក់កាលចុងក្រោយ» ខណៈលោកបានស្វាគមន៍មេដឹកនាំអ៊ុយក្រែន លោក Volodymyr Zelenskyy  មកកាន់គេហដ្ឋានរបស់លោកនៅរដ្ឋ Florida ។

មេដឹកនាំទាំងពីរបានឈរនៅខាងក្រៅរមណីយដ្ឋាន Mar-a-Lago កាលពីថ្ងៃអាទិត្យ ហើយបានថ្លែងទៅកាន់ក្រុមអ្នកសារព័ត៌មាន ខណៈលោកទាំងពីរត្រៀមពិភាក្សាអំពីសំណើថ្មីមួយ ដើម្បីបញ្ចប់ជម្លោះដ៏បង្ហូរឈាម។ 

ប្រធានាធិបតីអាមេរិក បានខិតខំប្រឹងប្រែងដើម្បីបញ្ចប់សង្គ្រាមជិតបួនឆ្នាំនៅអ៊ុយក្រែន អស់រយៈពេលជាច្រើនខែនៅឆ្នាំដំបូងរបស់លោក ដែលលោកបានវិលត្រឡប់មកកាន់តំណែងវិញ ដោយបង្ហាញពីការខឹងសម្បារជាមួយទាំងលោក Zelenskyy និងប្រធានាធិបតីរុស្ស៊ី លោក Vladimir Putin ខណៈទទួលស្គាល់ជាសាធារណៈអំពីការលំបាកក្នុងការបញ្ចប់ការប្រយុទ្ធគ្នានេះ។

លោក Trump បានថ្លែងថា លោកគិតថាពួកលោកស្ថិតក្នុងដំណាក់កាលចុងក្រោយនៃការនិយាយ ហើយពួកលោកនឹងរង់ចាំមើល។ បើមិនដូច្នោះទេ វានឹងបន្តរយៈពេលយូរ ហើយមនុស្សរាប់លាននាក់បន្ថែមទៀតនឹងត្រូវស្លាប់ ដោយបន្ថែមថាលោកពុំមានឱសានវាទសម្រាប់ដំណើរការនេះទេ។

លោកជឿថាពួកលោកមានកិច្ចព្រមព្រៀងដែលល្អសម្រាប់អ៊ុយក្រែន ហើយក៏នឹងល្អសម្រាប់មនុស្សគ្រប់គ្នាដែរ។

លោកបានបន្ថែមថា នឹងមានកិច្ចព្រមព្រៀងដ៏រឹងមាំមួយ ដើម្បីធានាសន្តិសុខរបស់អ៊ុយក្រែន ដែលនឹងពាក់ព័ន្ធដល់បណ្ដាប្រទេសនៅសហភាពអឺរ៉ុប៕